Եվրամիության մի շարք երկրներ՝ Ավստրիայի և Չեխիայի ղեկավարությամբ, արգելափակել են ԵՄ-ի կողմից «Հըզբոլլահ» լիբանանյան շարժման ռազմական թևն ահաբեկչական կազմակերպությունների ցուցակում ներառելու Մեծ Բրիտանիայի առաջարկը՝ հաղորդում է EUobserver-ը:
EUobserver-ի տեղեկատվության համաձայն՝ «սկեպտիկ» երկրները, այդ թվում՝ Իռլանդիան, Իտալիան և Լեհաստանը, մտավախություն ունեն, որ այդ քայլով Եվրամիությունը կարող է ապակայունացնել իրավիճակը Լիբանանում, որտեղ «Հըզբոլլահ»-ը խորհրդարանական խոշոր կուսակցություն է:
Բացի Լոնդոնից՝ Եվրամիության կողմից ծայրահեղ քայլի անհրաժեշտությանը աջակցում են նաև համայնքի «ծանրակշիռ» երկրները՝ Գերմանիան, Ֆրանսիան և Նիդերլանդները:
Ավելի վաղ Եվրահանձնաժողովի ղեկավար Ժոզե Մանուել Բարոզուն հայտարարել է, որ ԵՄ-ն կարող է քննարկել «Հըզբոլլահ»-ը ահաբեկչական կազմակերպությունների ցուցակում ներառելու հարցը Բուլղարիայի Բուրգաս քաղաքում ահաբեկչության հետաքննության արդյունքների հիման վրա: Բուլղարիայի իշխանություններն ավելի վաղ հայտարարել են, որ 2012թ. իսրայելցի զբոսաշրջիկներ տեղափոխող ավտոբուսի պայթեցման երկու կասկածյալներ «Հըզբոլլահ»-ի անդամներ էին:
