Ամռան առաջին օրը՝ հունիսի 1-ին, մի շարք երկրներում նշվում է Երեխաների միջազգային օրը՝ գրում է calend.ru-ն:
Երեխաների միջազգային օրը ամենահին միջազգային տոներից մեկն է: Տոնը նշելու որոշումն ընդունվել է 1925թ. Ժնևում երեխաների բարեկեցության հարցերին նվիրված Համաշխարհային համաժողովի ժամանակ: Պատմությունը լռում է, թե ինչու է այդ օրը նշվում հենց հունիսի 1-ին: Տոնն առաջին անգամ նշվել է 1950-ի հունիսի 1-ին, որից հետո այն նշվում է ամեն տարի:
Երեխաների միջազգային օրն ունի դրոշ: Ներդաշնակությունը, թարմությունը, աճը խորհրդանշող կանաչ ֆոնին պատկերված են կարմիր, դեղին, կապույտ, սպիտակ և սև մարդկային պատկերներ, որոնք խորհրդանշում են բազմազանությունը և հանդուրժողականությունը: Կենտրոնում պատկերված Երկրի նշանը մեր ընդհանուր տան խորհրդանշանն է:
Այսօր շատ երկրներում անցկացվում են զանգվածային, ժամանցային և մշակութային բազմաթիվ միջոցառումներ երեխաների համար:
