Ազատամարտիկ Խաչիկ Գասպարյանին և նրա ընտանիքի անդամներին մարտի 25-ին դատարանի որոշմամբ ԴԱՀԿ աշխատակիցները վտարել էին Գետափնյա գյուղում գտնվող իր տնից։ Նա 2010 թվականին 6 ամիս ժամկետով 23 հազար ԱՄՆ դոլար էր վերցրել հայտնի վաշխառու Արտակ Մարտիրոսյանից, ութ ամիս վճարումը ուշացրել է, ապա տոկոսներով 31 500 դոլար վերադարձրել, վաշխառուն ուշացման համար 20 հազար դոլար է պահանջել։ Առաջին ատյանի դատարանի վճիռը Խաչիկ Գասպարյանը բողոքարկել է, Վերաքննիչ դատարանում հունիսի ութին պետք է տեղի ունենա դատական նիստը։
Խաչիկ Գասպարյանը տնից վտարվելուց հետո նշել էր, որ բաց նամակով դիմելու է Սերժ Սարգսյանին, սակայն, ապրիլյան իրադարձությունների ժամանակ «Հայդուկ» ջոկատի և որդու հետ մեկնել էր Արցախ՝ հարավային ուղղությամբ։ Նրա խոսքերով՝ իր հետ կատարված անարդարությունը չէր կարող պատճառ հանդիսանալ սահման չգնալու համար։
Խաչիկ Գասպարյանի խոսքերով՝ այժմ ընտանիքի անդամների հետ ընկերների տնից տուն են տեղափոխվում, մայրը սրտի կաթված էր ստացել, մի քանի օր առաջ դուրս է գրվել հիվանդանոցից։ Խաչիկ Գասպարյանի եղբայրները ևս Արցախյան ազատամարտի մասնակիցներ են, նրանցից մեկը զոհվել է, երկուսը` երկրորդ կարգի հաշմանդամներ են: «Հայդուկ» ջոկատի թիկունքի պետ Ղազար Հարությունյանը Խաչիկ Գասպարյանին և նրա ընտանիքի անդամներին այս օրերին հյուրընկալել է իր տանը, ասում է՝ ազատամարտիկի նկատմամբ պետությունը պետք է փոխի իր վերաբերմունքը, քառօրյա պատերազմը ցույց տվեց, որ այսօր էլ ազատամարտիկների կարիքը սահմանին կա։
Ազատամարտիկները նշում են՝ անկախ նրանից, թե Վերաքննիչ դատարանն ինչ կորոշի, հայրենիքից, զինվորից երբեք չեն նեղանա, հարկ եղած դեպքում՝ կրկին սահման կգնան։
