Հայաստանի և Եվրոպական ներդրումային բանկի միջև նախատեսվում է կնքել ֆինանսական պայմանագիր, որով նշված բանկից համաֆինանսավորման համար կներգրավվի 5 մլն եվրո գումարի չափով վարկ՝ Երևանի Մետրոպոլիտենի վերականգնման ծրագրի երկրորդ փուլի իրականացման համար:
Հայաստանի և բանկի միջև արդեն կնքվել է համապատասխան պայմանագիր, որին հավանության տալու հարցը քննարկվելու է կառավարության վաղվա նիստում:
Ծրագրի նպատակն է ֆինանսավորել գերակա կապիտալ ներդրումները` Երևան քաղաքի մետրոյի համակարգը վերակառուցելու համար, ինչպես նաև՝ նվազեցնել ջրի ներհոսքը մետրոյի թունելներ: Ծրագրի հիմքում ընկած է Երևանի Մետրոպոլիտենի վերականգնման ծրագրի առաջին փուլում իրականացվող անհետաձգելի վերականգնողական աշխատանքներն ավարտին հասցնելը։
Տվյալ ներդրումները Հայաստանի մայրաքաղաքում հանրային տրանսպորտի մատուցած ծառայությունների բարելավման բարեփոխման միջոցառումների մասն են կազմում: Ծրագիրը նաև նպատակամղված է օգնելու ցածր եկամուտ ունեցող սոցիալական խմբերին, որոնք ներկայումս օգտվում են մետրոյի համակարգից։ Այն բաղկացած է հետևյալ մասերից և բաղադրիչներից.
Բաղադրիչ 1-2. Գործող դրենաժային թունելների վերակառուցում և ընդլայնում:
Այս բաղադրիչի իրականացումը նպատակամղված է լուծելու մետրոպոլիտենի ջրահեռացման խնդիրը: Նախատեսվում է գործող դրենաժային թունելը երկարացնել և հասցնել մինչև Հանրապետության հրապարակ, որը կապահովի ամբողջ տարածքի համար ստորգետնյա ջրերի մակարդակի իջեցում և զգալիորեն կբարելավի թունելների շահագործման պայմանները, ինչպես նաև կտա տնտեսական արդյունք՝ ներկայումս գործող պոմպակայաններում տեղադրված պոմպերի քանակի ակնկալվող կտրուկ նվազեցման դեպքում:
Բաղադրիչ 3. Մետրոյի թունելների վերակառուցում (ներառյալ՝ գրունտավորում և հակակոռոզիական մշակում):
Սույն բաղադրիչի ներքո կիրականացվեն աշխատանքներ, որոնք նպատակաուղղված են գործող թունելների տեխնիկական վիճակի առողջացմանը և թունելների շահագործման ժամկետի երկարացմանը:
Բաղադրիչ 4. Կայարանների և ծառայողական շինությունների բարելավում:
Սրա տակ նախատեսվում է իրականացնել կայարանների և ծառայողական շինությունների բարելավում՝ էկոլոգիական և սոցիալական միջոցառումների ծրագրի շրջանակներում:
Բաղադրիչ 5. Մետրոյի վագոնների վերանորոգում և արդիականացում:
Սույն բաղադրիչի ներքո նախատեսվում է շարունակել Երևանի Մետրոպոլիտենի վերականգնման ծրագրի առաջին փուլով սկսված՝ վագոնների վերանորոգման և արդիականացման գործընթացը՝ համալրելով այն ևս 7, իսկ հնարավորության դեպքում՝ 8 նորացված վագոններով:
Ծրագրի ավարտը նախատեսված է մինչև 2015 թվականի դեկտեմբերի 31-ը: