ԱՄՆ-ում անօրինական ներգաղթյալները հաճախ ավելի շատ օգնություն են ստանում, քան զինված ուժերի վետերանները՝ կարծում է Հանրապետական կուսակցությունից ԱՄՆ նախագահի պաշտոնին հավակնող միլիարդատեր Դոնալդ Թրամփը՝ փոխանցում է BBC-ն։
«Մենք թույլ չենք տա, որպեսզի այդպես շարունակվի»,- ասել է նա Վաշինգտոնում Rolling Thunder մոտոմրցավազքի ժամանակ։ Միջոցառումը նվիրված է եղել պատերազմի ռազմագերիների և անհետացածների հիշատակին։
Չնայած վետերանների շրջանում Թրամփի հանդեպ հակասական վերաբերմունքին՝ հավաքվածներից շատերը ողջունել են նրա այդ հայտարարությունը։
Նա իր խոսքերը, սակայն, որևէ կերպ չի հիմնավորել։
Անցած տարի միլիարդատերը կտրուկ քնադատության էր ենթարկել հանրապետական սենատոր և նախկին ռազմագերի Ջոն Մաքքեյնին։ Թրամփն ասել էր, որ Մաքքեյնին հերոս են համարում միայն այն բանի համար, որ նա Վիետնամի պատերազմի ժամանակ գերի է ընկել։ «Ինձ դուր են գալիս մարդիկ, ովքեր գերի չեն ընկել»,- հավելել էր Թրամփը։
Այդ ժամանակվանից ի վեր Թրամփը, ով բանակում չի ծառայել, փորձում է զրոյացնել իր արտահայտության հետևանքով ստացած վնասը։ Նա իր հանրահավաքների ժամանակ պարբերաբար հարգանք է արտահայտում վետերանների հանդեպ, ինչպես նաև ֆինանսավորում նրանց համար նախատեսված տարբեր միջոցառումներ։
Հունիսի 7-ին Թրամփը կմասնակցի Կալիֆոռնիայում Հանրապետական կուսակցությունից ներկուսակցական ընտրություններին։
