Ինչպես Foreign Policy-ի բլոգում պատմում է լրագրող Էլիաս Գրոլը, երեքշաբթի մի լրագրող Պուտինին հարցրել է, թե արդյոք նա իրեն «միայնակ» չի՞ զգացել «Մեծ ութնյակի» գագաթնաժողովին՝ մյուս առաջնորդների շարքում: Պուտինը հակադարձել է. «Քննարկումն ընդհանուր է եղել: Ինչ-որ մեկը ինչ-որ մեկի հետ համաձայնել է,ինչ-որ մեկը՝ ինչ-որ հարցի շուրջ վիճել: Սակայն ոչ մի անգամ չի եղել այնպես, որ Ռուսաստանը միայնակ պնդի սիրիական խնդրի լուծմանն իր մոտեցումները»:
Եթե գագաթնաժողովին Ռուսաստանի մեկուսացումը կոչված լիներ բեկման մղելուն, ապա ոչինչ չէր ստացվի՝ նկատում է Գրոլը: Պուտինը հասել է նրան, որ կոմյունիկեում Ասադի մասին չհիշատակվի:
«Այժմ Պուտինը սկսել է նման գագաթնաժողովներում հմտորեն չարագործի դեր խաղալ: Արձագանքելով սիրիացի ապստամբներին զենք մատակարարելու պահանջներին՝ նա մերժել է ջանքերը՝ հավասարազոր դարձնելով դա մարդակերներին զինելուն»,- ասվում է հոդվածում:
Հեղինակը նշում է, որ գագաթնաժողովին, որի նպատակը եղել է քաղաքացիական պատերազմի դադարեցումը, «իշխել են միայնության և մարդակերության մոտիվները»: «Սակայն մի´ անհանգստացեք, դիվանագիտական գործընթացը ողջ և առողջ է»,- եզրափակել է հոդվածագիրը:
