Ավան և Նոր Նորք վարչական շրջանների ընդհանուր իրավասության դատարանում Դավիթ Հարությունյանի նախագահությամբ ընթանում է Կառլեն Խաչատրյանի գործի դատական քննությունը:
Ըստ մեղադրանքի՝ նախկինում չդատված, 31-ամյա Կառլեն Խաչատրյանը 2013 թվականի հունվարի 23-ին, ժամը 21-ի սահմաններում Նորքի 4-րդ զանգվածում գտնվող իր բնակարանում ալկոհոլային հարբածության վիճակում ծեծի է ենթարկել կնոջը ու պատճառել թեթև վնասի հատկանիշներ պարունակող մարմնական վնասվածք:
2013 թվականի փետրվարի 7-ին նույն Կառլեն Խաչատրյանը գրավոր հաղորդում է տվել, թե Նորքի 7-րդ զանգվածում՝ Ավետիսյան և Դավիթ Բեկի փողոցների խաչմերուկում վիճաբանել է անհայտ անձի հետ, որի ժամանակ այդ անհայտ անձը դանակով հարվածել է իր որովայնի շրջանին, մարմնական վնասվածք պատճառել ու դիմել փախուստի:
Սակայն շուտով բացահայտվել է, որ դեպքի օրը՝ փետրվարի 7-ին, ժամը 14-ն անց 30-ի սահմաններում դարձյալ ոգելից խմիչքի ազդեցության տակ գտնվող Կառլեն Խաչատրյանը տնից վերցրել է խոհանոցային դանակը, գնացել Նորքի 7-րդ զանգվածում գտնվող «պիոներ պալատ»-ին հարող տարածք, ինքնասպանություն գործելու նպատակով հագուստները բարձրացրել և աջ ձեռքում պահած դանակով հարվածել է իր որովայնի ձախ հատվածին՝ ինքն իրեն պատճառելով ծակած-կտրած թափանցող վերքի ձևով ծանր մարմնական վնասվածք:
Կառլեն Խաչատրյանը մեղադրվում է կնոջը ծեծելու և սուտ մատնություն կատարելու համար՝ ՀՀ քրեական օրենսգրքի 118 հոդվածով և 333 հոդվածի 1-ին մասով:
Որպես Խաչատրյանի խափանման միջոց ընտրվել է չբացակայելու մասին ստորագրությունը:
