FEMEN շարժման ակտիվիստուհիները հունիսի 18-ի երեկոյան հերթական մերկ բողոքի ակցիան են կազմակերպել՝ այս անգամ թիրախ ընտրելով Կիևի Լիպսկի փողոցի շինություններից մեկը, որտեղ հաստատվել է Բելառուսի նախագահ Ալեքսանդր Լուկաշենկոն: Նա ժամանել է Ուկրաինա երկօրյա պաշտոնական այցով:
Ակտիվիստուհիները Լուկաշենկոյի տան մոտ եկել են ջահերով: Նրանք վիրավորական կոչեր են բղավել: Ոստիկանության տասնյակ ներկայացուցիչները, հատուկ ծառայության աշխատակիցները և Լուկաշենկոյի անձնական թիկնապահները միանգամից չեն կարողացել կարգի հրավիրել մի խումբ կիսամերկ աղջիկների:
Հունիսի 17-ին FEMEN-ի ակտիվիստուհիները նույնպես դիմել են իրենց կողմնակիցներին՝ կոչ անելով՝ «Օգնենք հասնել Էրդողանին»: Նրանք խնդրում են միջոցներ տրամադրել Թուրքիա մեկնելու համար:
«Մենք չենք կարող հանգիստ հետևել, թե ինչպես է Էրդողանի վարչակարգը գազով թունավորում, ծեծում և ջրցաններով հարձակվում Թաքսիմի խաղաղ ակտիվիստների վրա: Մենք կարծում ենք, որ այն պահն է, երբ մենք պետք է լինենք ձեզ հետ, քանի որ իսլամականացումը ողբերգություն է ոչ միայն թուրքական ժողովրդի, այլև ամբողջ աշխարհի համար»,- նշվում է շարժման հայտարարության մեջ:
