Լեռնային Ղարաբաղի հիմնախնդիը, Իրանի դեսպան Սաջադիի խոսքով, պիտի քննարկվի ԵԱՀԿ Մինսկի խմբի շրջանակներում և լուծվի խաղաղ բանակցությունների միջոցով, իսկ խաղաղապահ ուժերի տեղակայման հարցը կախված է Հայաստանի և Ադրբեջանի ղեկավարության որոշումներից:
Երևանի պետական համալսարանում այսօր անցկացվեց միջազգային արևելագիտական գիտաժողով՝ նվիրված Իրանի գրականությանն ու պատմությանը՝ «Պարսից գրականությունը և պատմությունը՝ ի մեծարումն Սաադի Շիրազիի» խորագրով: Հայաստանում Իրանի Իսլամական Հանրապետության արտակարգ և լիազոր դեսպան դեսպան Սեյյեդ Քազեմ Սաջադին ևս մասնակցում էր միջոցառմանը, որի շրջանակներում պատասխանեց մի քանի լրատվամիջոցների հարցերին:
Իրանական գրականության մեծերը ՝ Ֆիրդուսին, Սաադին, Շիրազին, Խայամը և մյուսները ճանաչված են ողջ աշխարհում,- ասում է դեսպան Սաջադին,- նրանք պատկանում են բոլորիս, Հայաստանում էլ բոլորը շատ լավ գիտեն Իրանի մեծերին: Եվ հաշվի առնելով հայ ժողովրդի սերն ու հետաքրքրությունը իրանցի գրողների հանդեպ՝ նմանատիպ միջոցառումներ կազմակերպվում են նաև Հայաստանում:
«Առաջին լրատվական». –Պարոն դեսպան, մշակութային կապերն իրոք շատ սերտ են, բայց ի՞նչ կասեք տնտեսական կապերի մասին: Ի՞նչ անել տնտեսական հարաբերությունները զարգացնելու համար:
– Պիտի ասեմ, որ բարեբախտաբար վերջին շրջանում մեծ ուշադրություն է հատկացվում զբոսաշրջության ոլորտին և դա իր հերթին նաև նպաստում է, որ երկու երկրների գործարարները փոխադարձ այցեր կազմակերպեն՝ ճանաչելով միմյանց մշակույթը և հնարավորությունները, որոնք կան այդ երկրներում, փորձել զարկ տալ տնտեսական հարաբերություններին:
«Առաջին լրատվական». – Ի՞նչ քայլեր են արվել Հայաստան-Իրան երկաթուղին կառուցելու ուղղությամբ:
– Մենք հրավիրել ենք Իրանի համապատասխան մասնագետներին, որոնք պիտի Հայաստան այցելեն և քննարկումներ ունենան այդ հարցի շուրջ: Բարեբախտաբար պիտի նշեմ Իրանի և Հայաստանի համապատասխան նախարարների արդյունավետ հանդիպման մասին, որը կազմակերպվել էր վերջերս: Եվ հուսով ենք, որ կկարողանանք գրավել իրանական կողմի ուշադրությունը՝ մասնակցություն ունենալու և այս նախագիծը կյանքի կոչելու համար:
«Առաջին լրատվական». – Ռազմական գործողությունների վերսկսումը ղարաբաղյան հակամարտության գոտում ի՞նչ սպառնալիքներ առաջացրեցին Իրանի համար: Ինչպե՞ս պիտի կանխվի նոր հնարավոր պատերազմը Լեռնային Ղարաբաղում:
– Իրանի Իսլամական Հանրապետությունը միշտ ապրել է իր հարևան պետությունների հետ խաղաղ պայմաններում և միշտ փորձել է կանխել նման գործողությունները, որոնք տեղի են ունենում հայկական և ադրբեջանական կողմերի միջև:
– News.am. – Ադրբեջանի ապակառուցողական գործողությունները չե՞ն խոչընդոտում տարածաշրջանում խաղաղության հաստատմանը:
– Այս հարցը պիտի քննարկվի Մինսկի խմբի շրջանակներում և բանակցություններ վարելով՝ պետք է հասնել խնդրի խաղաղ կարգավորմանը:
– Հայաստանի Հանրային ռադիո. – Հատկապես քառօրյա պատերազմից հետո ավելի հաճախ սկսեցին խոսել շփման գծում խաղաղապահ ուժեր տեղակայելու մասին: Ո՞րն է Իրանի դիրքորոշումն այս մասով:
– Մենք միշտ փորձել ենք զսպվածության կոչ անել երկու երկրներին, և այս հարցը կախված է երկու երկրների բարձրաստիճան ղեկավարների որոշումներից:
