Facebook ընկերության ղեկավար Մարկ Ցուկերբերգը հանդիպել է Հարավային Կորեայի նախագահ Պակ Կին Հեի հետ, որպեսզի քննարկի այդ երկրում բիզնեսի հեռանկարները: Այս մասին հաղորդում է Associated Press-ը:
Պակ Կին Հեի վարչակազմում ասել են, որ Ցուկերբերգը խոստացել է հետագայում ևս ներդրումներ իրականացնել Հարավային Կորեայում: Նա նաև տեղի ֆիրմաներին կոչ է արել ավելի ակտիվորեն օգտվել համացանցից:
Ավելի վաղ Հարավային Կորեայի նախագահը հանդիպել է ամերիկյան ևս 2 խոշոր IT ընկերությունների ներկայացուցիչների հետ: Ապրիլին տեղի են ունեցել Microsoft-ի հիմնադիր Բիլ Գեյթսի և Google-ի համահիմնադիր Լարի Փեյջի հետ հանդիպումները:
Պակի կարծիքով, ձեռնարկատիրության մեջ սթարթափների, այսպես ասած, «առաջացումն» իր պաշտոնավարման հնգամյա ժամկետի ավարտին կհանգեցնի բնակչության 70 տոկոսի զբաղվածությանը:
