Բաց կառավարման գործընկերություն – Հայաստան առաջին միջազգային համաժողովի բացմանը Հայաստանում ԱՄՆ դեսպան Ջոն Հեֆերնը անդրադարձել է «Հազարամյակների մարտահրավերներ» ծրագրին, որը 2009-ի հունիսից դադարեցրել է գործունեությունը Հայաստանում:
«Առաջին լրատվական»-ի հարցին՝ «Հազարամյակների մարտահրավերներ» ծրագիրը հնարավո՞ր է՝ այս տարի վերսկսի գործունեությունը Հայաստանում, Ջոն Հեֆերնը պատասխանեց, որ «Հազարամյակների մարտահրավեր» կորպորացիան մոտ 13 ցուցանիշ է դիտարկում, որոնց շարքում հատկապես կարևորվում են հակակոռուպցիոն աշխատանքները: «Որպեսզի երկիրը համապատասխանի և կարողանա «Հազարամյակի մարտահրավեր» կորպորացիայի հետ ծրագիր իրականացնել, այդ չափանիշները պետք է անպայման ապահովված լինեն»,- ասաց ԱՄՆ դեսպանը:
«Ինչպես փոխարտգործնախարարը նշեց, Հայաստանը այդ չափանիշներին շատ մոտ է արդեն: Հակակոռուպցիոն ցուցանիշի մասով Հայաստանը չհասավ պահանջվող շեմին, և անհրաժեշտ է, որ այդ ուղղությամբ դեռ աշխատանքներ իրականացնի: Դա, անշուշտ, կարևոր է Հայաստանի համար, որ կարողանա բավարարել «Հազարամյակի մարտահրավեր» կորպորացիայի կողմից դիտարկվող այդ ցուցանիշը»,- ասաց դեսպանը՝ հավելելով, որ այս առումով բաց կառավարման գործընկերության գործողությունների ծրագիրը կարող է օգտակար լինել, որովհետև շատ բան դրանցում ուղղված է հենց բաց և թափանցիկ կառավարման հարցերին:
«Մենք խրախուսում ենք գործողությունների ծրագրով առաջընթացը, աշխատանքները, և առաջարկում ենք աջակցել այն հարցերում, որոնց շուրջ մեր օգնության կարիքը կզգացվի: Հայաստանի հանձնառությունը բաց կառավարման գործընկերության շրջանակում շատ տպավորիչ է՝ 26 մասից կազմված գործողությունների պարտավորություն են ստանձնել»,- ասաց նա:
Դեսպանը նշեց, թե ՀՀ վարչապետն ու փոխարտգործնախարարը ընդունում են, որ գործողությունների ծրագրով անելիքներ շատ կան, իսկ ԱՄՆ-ը պատրաստ է այս ծրագրով համագործակցել Հայաստանի հետ մասնակից բոլոր պետությունների շրջանակում:
Լուսանկարը՝ Armenpress-ի
