ՀՀԿ-ական Գալուստ Սահակյանը երեկ հայտարարել է, որ երկրի խնդիրը Հանրապետականը չէ, երկրի խնդիրը հայ մարդն է: Եթե դատելու լինենք այս հայտարարության մասին երկրի այն պատկերացումներով, որ ունի Գալուստ Սահակյանն ու նրա Հանրապետականը, ապա իսկապես, այդ երկրի խնդիրը հայ մարդն է, որը ընտրություններին չի ցանկանում գնալ ու ձայն տալ ՀՀԿ-ին և ստիպում է կեղծել ընտրությունները, որը չի համակերպվում իր իրավունքների ոտնահարմանը և ստիպում է հարգել դրանք, որը բողոքում է թանկացումների դեմ, որը սոցիալական և իրավական առումով արդարություն է ակնկալում և պահանջում, արդարադատություն է պահանջում, պահանջում է հավասար մրցակցություն:
Ահա այդ մարդն իսկապես պրոբլեմ է ջիպերով ու դղյակներով, թանկարժեք ու ճոխ կյանքով լեցուն այն միջավայրի համար, որը որպես երկիր պատկերացնում են Սահակյանն ու ընկերները: Հայ մարդը նրանց չի թույլ տալիս վայելել այդ երկիրը, չի թույլ տալիս առանց աչք թարթելու ըմբոշխնել այդ ճոխությունն ու վայելքը: Եվ դրա համար էլ Գալուստ Սահակյանն ու ընկերները առանց աչք թարթելու անում են ամեն ինչ, որպեսզի հայ մարդը արտագաղթի երկրից, որպեսզի երկրում նա չունենա որևէ հեռանկար: Շարունակում են անիրավությունները, շարունակվում է երկրի բաժանումը ֆեոդալների միջև, շարունակվում է տնտեսական արդյունքի յուրացումը մի քանի տասնյակ ընտանիքների միջև, շարունակվում են քաղաքական խաղերը հասարակության գլխին, շարունակվում են թանկացումները:
Հայ մարդը խնդիր է և պետք է հեռանա, չկա մարդը` չկա խնդիրը: Ահա ՀՀԿ-ի այսօրվա երկրի այսօրվա կարգախոսը: Եվ հատկանշական է, որ այս ամենը հանրապետականները չեն էլ թաքցնում, նույնիսկ կատակի շղարշի տակ: Եթե մի քանի ամիս առաջ վարչապետը կատակով էր մտահոգություն հայտնում մնացողների և հեղափոխության ռիսկի կապի մասին, ապա Գալուստ Սահակյանն այսօր լուրջ դեմքով է հայտարարում, որ երկրի խնդիրը հայ մարդն է:
Բանն այն է, որ հայ մարդկանց և Հանրապետականի երկրները տարբեր են: Սակայն անկախության քսան տարիների ընթացքում դրանք բավականաչափ լղոզվել են: Այսօր խնդիրը այս երկրները տարանջատելն է, ինչից էլ կտարանջատվեն այդ երկրների խնդիրները, և հայ մարդու համար իր խնդիրները լուծելը կդառնա շատ ավելի հեշտ ու պարզ: Պետք է միայն զատել Հանրապետականի և հայ մարդու երկրները: Դա ռազմավարական խնդիր է, որը պահանջում է մեթոդական լուծումների շուրջ քննարկումներ հասարակական այն բոլոր շրջանակներում, որոնք ՀՀԿ երկրից չեն, և որոնց համար ոչ թե հայ մարդն է խնդիր, այլ Հանրապետականը:
Լուսանկարը՝ PanARMENIAN Photo-ի
