Apple-ը, Facebook-ը, Yahoo-ն ու Google-ը հերքում են տեղեկություններն այն մասին, թե իրենք իրենց սերվերներից տեղեկություններ են տրամադրում ԱՄՆ հատուկ ծառայություններին: Այս մասին հայտնում է ITAR-TASS-ը:
Apple ընկերությունը հերքում է մասնակցությունը ԱՄՆ հատուկ ծառայությունների գերգաղտնի ծրագրին, որի շրջանակում ԱՄՆ իշխանությունները հասանելիություն են ստանում համացանցային օգտատերերի տվյալներին: Այս մասին հայտարարել է ընկերության պաշտոնական ներկայացուցիչ Սթիվեն Դոուլինգը:
«Մենք երբեք չենք լսել այդ ծրագրի մասին: Մենք ոչ մի կառավարական գերատեսչության ուղիղ հասանելիություն չենք տրամադրում մեր սերվերներին: Ցանկացած դաշնային կառուց, որը տեղեկություններ է խնդրում մեր հաճախորդների մասին, սկզբում պետք է դատական օրդեր ստանա»,- նշել է նա:
Google-ում վստահեցրել են, որ ընկերությունը լրջորեն հոգ է տանում իր հաճախորդների անվտանգության համար և իր բազան կառավարության համար բացահայտում է միայն համաձայն օրենքի:
Համանման հայտարարություններով հանդես են եկել նաև Facebook-ն ու Yahoo-ն:
Ինչպես ավելի վաղ գրել էին The Guardian-ն ու The Washington Post-ը, ԱՄՆ ազգային անվտանգության գործակալությունն ու Հետաքննությունների դաշնային բյուրոն արդեն մի քանի տարի է՝ ուղիղ հասանելիություն ունեն Microsoft-ի, Yahoo-ի, Google-ի, Facebook-ի, PalTalk-ի, AOL-ի, Skype-ի, YouTube-ի և Apple-ի սերվերներին: Նշվում էր, որ PRISM ծածկանվամբ ծրագրի շրջանակում հատուկ ծառայությունները հավաքում են աուդիո և վիդեոֆայլեր, լուսանկարներ, էլեկտրոնային նամակագրություն, փաստաթղթեր և այլն: