ԱԺ նախագահ Գալուստ Սահակյանը լրագրողների հետ զրույցում չցանկացավ մեկնաբանել ԴԱՀԿ ծառայության ղեկավար Միհրան Պողոսյանի հրաժարականի պատճառները՝ ասելով. «Ես չգիտեմ ինչու է հրաժարական տվել, ինքը մեկնաբանել է, թե ինչու է դուրս գալիս: Մարդն ինքն է որոշում, թե ինչպես պետք է պատասխանի, և ես չեմ կարծում, թե դա այն հրատապ հարցն է, որ պաշտոնաթող մարդու մասին պետք է կարծիքներ հնչեն, թե ինչի հետևանքով հրաժարական տվեց»,- ասաց Գալուստ Սահակյանը՝ հավելելով, որ «լրագրողության» միջոցներով է կարդացել ինչ-ինչ սկանդալային պատճառների մասին:
Ըստ ԱԺ նախագահի՝ ինքը աշխատանքային փոխհարաբերություններ չի ունեցել Միհրան Պողոսյանի հետ, որ կարողանա գնահատականներ տալ, բայց այդ կառույցը, նրա խոսքով, վերջին տարիներին լավ է աշխատել: ԱԺ նախագահը չի կարծում, որ Միհրան Պողոսյանի հրաժարականը կարող է իրավական հետևանքներ ունենալ. «Այլ բան է՝ եթե մարդը հանցագործ է, դրա համար պետք է պատասխան տա»,- ասաց նա: Դիտարկմանը, որ պետք է պատասխան տա օֆշորային սկանդալի համար, Գալուստ Սահակյանը պատասխանեց, որ այդ ամենը մամուլում շրջանառվող մտքեր են. «Եթե իրողություններն այնպիսին լինեն, որ հակասեն մեր երկրի օրենսդրությանը, բնականաբար, ցանկացած մարդ պետք է պատասխան տա»:
Հարցին, թե հնարավո՞ր է, որ Միհրան Պողոսյանն այլ պաշտոնի անցնի, Գալուստ Սահակյանը պատասխանեց, որ եթե նրա մասին մամուլում շրջանառվող լուրերը ճիշտ չլինեն, ուրեմն կարող է և այլ պաշտոնի անցնել:
Գալուստ Սահակյանը անդրադարձավ նաև հարցին, թե ինչո՞ւ է հայկական բանակը կռվում 80-ականների զենքով: «Մի՛ մտածեք, որ 80-ականների զենքը փչացած է և չի աշխատում: Երբ բյուջեն ենք հաստատում, փոքր քանակ է գնում դեպի զենքը, այսինքն՝ մենք այդքան մեծ բյուջեներ չունենք: Ինչը որ ունենք, հստակ պահպանվում է»,- ասաց նա:
Անդրադառնալով դիտարկմանը, որ մեր երկրում մի քանի մարդ անհավասար պայմաններում, չարաշահումներով հարստանում է, բայց բանակը հին զենքով է կռվում, Գալուստ Սահակյանը նշեց. «Մարդիկ երևի իրենց բիզնեսն ունեն ու կարողանում են հարստանալ, չեմ կարծում, որ դա ամենավտանգավոր բանն է, որ մարդը հարստանում է, ու նրան պետք է պատժել: Եթե չարաշահումների մասին եք ասում, դրա համար կա համապատասխան բաժին, այլ ոչ թե Գալուստ Սահակյանը, դիմե՛ք այդ բաժին»:
Մանրամասները՝ տեսանյութում:
