Այսօր Երևանում կայացել ՀԱՊԿ-ի Ռազմական կոմիտեի հերթական նիստը, որին մասնակցում էին կազմակերպության անդամ պետությունների՝ Հայաստանի, Բելառուսի, Ղազախստանի, Ղրղըզստանի, Ռուսաստանի, Տաջիկստանի զինված ուժերի գլխավոր շտաբների պատվիրակությունները, ինչպես նաև ՀԱՊԿ-ի գլխավոր քարտուղարը և Միացյալ շտաբի պետը: Սա Ռազմական կոմիտեի 8-րդ նիստն է և առաջին անգամ է անցկացվում Հայաստանում, և երկրորդ նիստը՝ կազմակերպությունում Հայաստանի նախագահության օրոք:
Նիստի ավարտին ՀԱՊԿ անդամ պետությունների զինված ուժերի գլխավոր շտաբների պետերը հանդես եկան ամփոփիչ հայտարարությամբ լրատվամիջոցների համար:
ՀՀ ԶՈւ գլխավոր շտաբի պետ Յուրի Խաչատուրովը հայտարարեց, որ հայկական կողմը նիստի ժամանակ լուրջ մտահոգություն է հայտնել Ադրբեջանի սանձազերծած ռազմական հարձակման կապակցությամբ, թեև մեր կողմից նշենք, որ այդպես էլ չպարզվեց, թե ինչ դիրքորոշում են հայտնել կազմակերպության մյուս անդամ պետությունները ադրբեջանական ագրեսիայի վերաբերյալ: Նշվում է միայն, որ տեղի է ունեցել մտքերի փոխանակում տվյալ հարցի շուրջ:
Յուրի Խաչատուրովը մասնավորապես նշեց. «Մենք քննարկել ենք օրակարգի բոլոր հարցերը: Մեր կողմից նշվել է, որ ռազմական անվտանգության սպառնալիքները ՀԱՊԿ-ի պատասխանատվության տարածքում համալիր բնույթ են կրում և շոշափում են քաղաքական, տնտեսական, տեղեկատվական և կենսական նշանակություն ունեցող մյուս բնագավառները: Դա առաջացնում է անհրաժեշտություն՝ աջակցելու և կատարելագործելու խաղաղության և անվտանգության ապահովման մեխանիզմները հավաքական անվտանգության տարածաշրջաններում, ինտեգրացիոն գործընթացները, ինչպես նաև անդամ պետությունների ակտիվ քաղաքականության իրականացումը հավաքական և սեփական ազգային շահերը պաշտպանելու ուղղությամբ:
Իմ գործընկերները տեղեկացվել են ապրիլի սկզբին Լեռնային Ղարաբաղի պաշտպանության բանակի և Ադրբեջանի Հանրապետության զինված ուժերի շփման գծի երկայնքով ստեղծված օպերատիվ իրավիճակի մասին: Հայկական կողմը լուրջ մտահոգություն է հայտնել ադրբեջանական կողմի սանձազերծած ռազմական ագրեսիայի կապակցությամբ, որի հետևանքով մեծաթիվ զոհեր են եղել՝ ներառյալ խաղաղ բնակչության շրջանում: Տեղի է ունեցել մտքերի փոխանակում տվյալ հարցի վերաբերյալ:
Մենք համաձայնության եկանք ՀԱՊԿ-ի միասնական շտաբի գործունեության կատարելագործման հարցի շուրջ, հստակեցրինք առաջադրված խնդիրները, գործառույթները, կառուցվածքը և շտաբը:
Հաշվի առնելով ռազմաքաղաքական իրավիճակը, այդ թվում՝ վերջին իրադարձությունները կովկասյան տարածաշրջանում՝ նախանշել ենք մեր հետագա աշխատանքը ՀԱՊԿ-ի ռազմական բաղադրիչի զարգացման ուղղությամբ: Ինձ՝ որպես նախագահող, հանձնարարված է ստորագրել ամփոփիչ արձանագրություն, որտեղ ֆիքսված են ձեռք բերված պայմանավորվածությունները, և տրվել են համապատասխան հանձնարարություններ ՀԱՊԿ-ի միասնական շտաբին»:
