Meydan.TV-ի փոխանցմամբ՝ ապրիլի 1-5-ը Ղարաբաղյան ճակատում տեղի ունեցած մարտերի ժամանակ Ադրբեջանի զինված ուժերի տված սպանվածների ու վիրավորների մասին ստույգ տեղեկատվություն չկա։
Պաշտպանության նախարարությունը պաշտոնապես հայտարարել է 31 սպանվածի մասին, սակայն սպանվածների իրական ցուցակը չի ներկայացվել հանրությանը. կորուստների իրական թիվը շատ ավելի մեծ է։
ՊՆ-ի պաշտոնական կայքում (Mod.gov.az) միայն նշված է, որ առաջնագծում ապրիլի 2-ին սպանվել է 12, ապրիլի 3-ին՝ 3, ապրիլի 4-ին ու 5-ին՝ 16 զինծառայող։
Meydan TV-ն պատրաստել է մարտերի ժամանակ սպանվածների իր ցուցակը՝ հենվելով նաև սոցցանցերից ստացված տվյալների վրա։ Այն ստացվել է շատ ավելի ընդգրկուն։ Դրա համաձայն՝ 4 օրում ադրբեջանական բանակը տվել է առնվազն 64 սպանված։ 6 զինծառայող էլ համարվում է անհետ կորած։ Հաղորդվում է, որ կորուստների ցուցակը շարունակ թարմացվում է։
