Ադրբեջանում ուժեղացվել է ԶԼՄ-ների նկատմամբ գրաքննությունը: Ադրբեջանի Մամուլի խորհուրդը երկրի ԶԼՄ-ներից պահանջել է այսօր գիշերվանից ադրբեջանա-ղարաբաղյան հակամարտ զորքերի շփման գծում լարվածության աճի մասին լուրեր տարածել միայն հայրենի Պաշտպանության նախարարության հաղորդագրությունների հիման վրա:
Ադրբեջանական faktxeber.com կայքի փոխանցմամբ՝ Ադրբեջանի Մամուլի խորհուրդը դժգոհություն է հայտնել, որ ԶԼՄ-ներն իրենց հաղորդագրություններում ավելի շատ հղում են կատարում շփման գծին մոտ շրջաններում բնակվող անձանց հաղորդած լուրերին և արտասահմանյան ԶԼՄ-ներին, քան սեփական ՊՆ-ի հաղորդագրություններին, ինչը վկայում է այն մասին, որ ադրբեջանցի ժողովուրդը չի վստահում սեփական պաշտոնական աղբյուրներին:
Նախորդ միջադեպերից հայտնի է, որ ադրբեջանական իշխանությունները լրջորեն պատժի են ենթարկել շատ թե քիչ ազատություն դրսևորած ԶԼՄ-ներին, որոնք համարձակվել են շփման գծում իրադարձությունների մասին տեղեկություններ հաղորդել՝ հղում կատարելով սեփական աղբյուրներին:
