Պենտագոնը և Թմրանյութերի տարածման դեմ պայքարի հարցերով վարչությունը (DEA) ընդհանուր ավելի քան 86 մլն դոլար են ծախսել ATR 42-500 ռազմական ինքնաթիռ-հետախույզի ստեղծման և արդիականացման համար, որը միտված էր Աֆղանստանում իրականացվելիք գործողություններին, 7 տարի է, ինչ չի կտրվել գետնից: Այդ մասին ասվում է Washington Post թերթի հոդվածում:
«DEA-ն և Պենտագոնն ավելի քան 86 մլն դոլար են ծախսել ինքնաթիռ-հետախույզի գնման և կատարելագործման վրա, որը սարքավորված է հսկման ժամանակակից համակարգերով, և նախատեսված է Աֆղանստանում գործողությունների իրականացման համար: Մենք պարզել ենք, որ օդանավի ձեռքբերումից ավելի քան 7 տարի անց այն մնում է ոչ աշխատանքային վիճակում, չի մեկնել Աֆղանստան և հիմա Դելավեր նահանգի օդանավակայաններից մեկում է»,- մեջբերում է պարբերականը անկախ վերահսկիչ մարմին արդարադատության նախարարության գլխավոր տեսուչի իր ձեռքի տակ հայտնված 59 էջանոց զեկույցը:
Ավելի քան 7 տարում DEA-ն և ԱՄՆ պաշտպանության նախարարությունը տասնյակ միլիոնավոր դոլարներ են ծախսել ինքնաթիռի արդիականացման և վերանորոգման համար:
Հիմա DEA-ն ծրագրում է ինքնաթիռն օգտագործել Կարիբյան ավազանի ջրային տարածքում, Կենտրոնական և Հարավային Ամերիկայի երկրներում: Սակայն, ինչպես նշում է Washington Post-ը՝ դրա համար կարող է պետք լինել մի շարք փոփոխություններ անել ինքնաթիռի սարքավորման մեջ:
