Georgia Online-ի փոխանցմամբ՝ Վրաստանի նախագահ Գեորգի Մարգվելաշվիլին, որը աշխատանքային այցով գտնվում է Վաշինգտոնում, հանդիպել է ԱՄՆ գործադիր իշխանության ներկայացուցիչների հետ, որոնք զբաղվում են ՆԱՏՕ-ի և անվտանգության հետ կապված հարցերով։
Այդ մասին հայտնել է Վրաստանի նախագահի մամլո ծառայությունը, որի հաղորդմամբ՝ հանդիպման ժամանակ քննարկվել են քաղաքական, ռազմական, առևտրային ոլորտներում համագործակցության խորացումը, ինչպես նաև անվտանգության ոլորտում համագործակցությունն ու ՆԱՏՕ-ի և Վրաստանի փոխհարաբերությունները։
Մարգվելաշվիլին վստահեցրել է, որ Վրաստանը կշարունակի գլոբալ սպառնալիքների դեմ, խաղաղության պաշտպանության և ընդհանուր արժեքների համար պայքարում մնալ Արևմուտքի հուսալի դաշնակիցը։ Նա ընդգծել է ԱՄՆ-ի հետ ռազմավարական համագործակցության մեծացման անհրաժեշտությունը։
Մարգվելաշվիլիի խոսքով՝ Վրաստանը տարածաշրջանի միակ երկիրն է, որը հայտարարել է, որ իր նպատակը ՆԱՏՕ-ին ու ԵՄ-ին անդամակցելն է:
«Եվրոպական և եվրաատլանտյան կուրսը մեր պատմական ընտրությունն է։ Մեր երկրի բազում սերունդները ձգտում են այդ երազանքը դարձնել իրողություն։ Մենք եվրոպական ընդհանուր տիրույթի բնական մասն ենք».- ասել է նա։
