Ադրբեջանական Turan լրատվական գործակալության փոխանցմամբ՝ ԵՄ դիվանագիտության ղեկավար Ֆեդերիկա Մոգերինին ողջունել է Ադրբեջանում իրավապաշտպան Ինթիգամ Ալիևին ազատ արձակելը: Նա կոչ է աչել բանտերից ազատ արձակել մնացած ակտիվիստներին:
«Ադրբեջանի Գերագույն դատարանի որոշումը, որով մարդու իրավունքների հարցերով հայտնի փաստաբան Ինթիգամ Ալիևը, ով բանտում անցկացրել է երկու տարի, ստացավ պայմանական ազատազրկում, Ադրբեջանում ևս մեկ դրական զարգացում է:
Դա տեղի ունեցավ այս ամսվա ընթացքում՝ Նովրուզի տոնի կապակցությամբ քաղաքական կուսակցությունների, հասարակական կազմակերպությունների ներկայացուցիչների, լրագրողների հանդեպ ընդունված համաներումից հետո:
ԵՄ-ն հուսով է, որ վաղուց սպասվող այդ քայլերին կհաջորդեն նոր միջոցներ՝ կապված բոլոր նրանց ազատ արձակման ու վերականգնման հետ, ովքեր ներկայումս մնում են ազատազրկման մեջ, կամ էլ քաղաքական դրդապատճառներով սահմանափակված է նրանց ազատ տեղաշարժը՝ համաձայն միջազգային պարտավորությունների, որ ստանձնել է Ադրբեջանը որպես ՄԱԿ-ի, ԵԽ-ի ու ԵԱՀԿ անդամ:
Անկախ ու խայտաբղետ քաղաքացիական հասարակությունը կարևոր ներդրում ունի երկրի կայունության ու բարեկեցության մեջ»,- ասել է Մոգերինին:
Ադրբեջանական մամուլի տվյալներով՝ բանտերում դեռ շարունակում են մնալ մոտ 90 քաղբանտարկյալներ:
