Ադրբեջանական APA լրատվական գործակալության փոխանցմամբ՝ Ադրբեջանի արտգործնախարար Էլմար Մամեդյարովը Չինաստան կատարած այցի շրջանակներում հանդիպել է այդ երկրի արտգործնախարար Վան Իի հետ։ Այդ մասին հայտնել է Ադրբեջանի ԱԳՆ մամլո ծառայությունը։
Վերջինիս հաղորդմամբ՝ հանդիպման ժամանակ Վան Ին գոհունակություն է հայտնել երկու երկրների միջև հարաբերությունների զարգացման կապակցությամբ։ Նա նաև գոհունակություն է հայտնել, որ Ադրբեջանը ստացել է ՇՀԿ-ի երկխոսության գործընկերոջ կարգավիճակ:
«Չինաստանը մեծ նշանակություն է տալիս տրանսպորտային միջանցքների զարգացմանը և պատրաստ է Ադրբեջանի հետ համագործակցել այդ և շատ այլ ոլորտներում ևս»,- ասել է նա։
Մամեդյարովը իր հերթին հայտարարել է, որ Ադրբեջանն աջակցում է «Մետաքսի ճանապարհի տնտեսական գոտի» նախագծին, որի նախաձեռնողը Չինաստանն է։ Մամեդյարովը հավելել է, որ Ադրբեջանը «Արևելք-Արևմուտք» և «Հյուսիս-Հարավ» տրանսպորտային միջանցքների կարևոր բաղկացուցիչ է։
Մամեդյարովի խոսքով՝ Ադրբեջանի տարանցիկ հնարավորությունները կընդլայնվեն «Բաքու-Թբիլիսի-Կարս» երկաթգիծը շահագործման հանձնելուց հետո։
