ԱՄՆ Ազգային անվտանգության գործակալության նախկին աշխատակից Էդվարդ Սնոուդենը իսպանական Sexta հեռուստաալիքին տված հարցազրույցում հայտարարել է, որ ահաբեկչության դեմ պայքարին ուղղված հատուկ ծառայությունների ծրագրերը անարդյունավետ են և չեն կանխել ոչ մի ահաբեկչական հարձակում: Այս մասին հայտնում է RIA Novosti-ն:
«Ոչ ոք կասկածի տակ չի դնում այն, որ անհրաժեշտ է հետևել ահաբեկիչներին, նրանց գործունեությանը: Սակայն 2013 թվականի բաց փաստաթղթերից մենք տեսնում ենք, որ իշխանությունները ահաբեկչության քողի տակ իրականում գործել են այն մարդկանց դեմ, ովքեր բացարձակ կապ չեն ունեցել ահաբեկիչների հետ: Մենք լրտեսել ենք իրավաբանների… մենք լրտեսել ենք ՅՈՒՆԻՍԵՖ-ին, փաստաբանների, պրոֆեսորների… Դրանք չեն եղել ահաբեկիչների հետ կապված կասկածյալներ»,- հայտարարել է Սնոուդենը:
Նա նաև հիշեցրել է, որ կապվել է ԱՄՆ կառավարության հետ, որպեսզի «համաձայնության գան», սակայն ստացել է միայն երաշխիքներ, որ «իրեն չեն խոշտանգի»:
Սնոուդենը նաև հայտարարել է, որ երբեք չի աշխատել Ռուսաստանի կառավարության հետ և մտադիր չէ մնալ Ռուսաստանում:
«Ես չեմ մտածում, որ ռուսական կառավարությունը ինձ ավելի է ցանկանում, քան ցանկացած այլ երկիր: Խնդիրն այն է, որ ես երբեք չեմ պատրաստվել մնալ Ռուսաստանում»,- ասել է նա և հիշեցրել, որ մտադիր է Հոնկոնգից ուղևորվել Իսլանդիա, ապա իր ծրագրերի մեջ են մտնում լատինաամերիկյան երկրները:
