ԵՄ անդամ երկրների ԱԳՆ ղեկավարները մարտի 14-ին հատուկ նիստում կքննարկեն Ռուսաստանի հետ հարաբերությունների նոր ռազմավարության մշակումը: Այս մասին գրում է «Կոմերսանտը»՝ հղում անելով իր աղբյուրներին:
Պարբերականի տեղեկությամբ՝ ԱԳՆ ղեկավարները կփորձեն նոր ռազմավարություն մշակել, քանի որ ԵՄ-ում ընդունել են Ռուսաստանի հետ նախկին հարաբերություններին վերադառնալու անհնարինությունը: «Վերջին երկու տարիների դեպքերի ֆոնին եվրոպական մայրաքաղաքներում եզրակացրել են, որ ցանկացած սցենարի դեպքում Ռուսաստանի հետ business as usual ոգով հարաբերություններին վերադարձ չի կարող լինել: Այժմ մենք հստակորեն Ռուսաստանի հետ հարաբերությունների ոչ մի ընդհանուր տեսլական չունենք, կան միայն պատժամիջոցներ, բայց այդպես հավերժ շարունակվել չի կարող: Մեզ պետք է new normal՝ նոր պայմաններում Մոսկվայի հետ փոխգործակցության երկարաժամկետ ռազմավարություն»,- նշել է ԵՄ կառույցների աղբյուրը:
Մեկ այլ աղբյուրի խոսքով՝ առայժմ ոչ մի կոնկրետ որոշում ընդունել չի ծրագրվում: Սակայն արդեն մոտ ժամանակներս կարող է ներկայացվել զեկույց ԵՄ-ի և Եվրասիական տնտեսական միության (ԵՏՄ) համագործակցության նպատակահարմարության մասին: «Կոմերսանտի» տեղեկությամբ՝ եվրոպացի փորձագետները եզրակացրել են, որ դեռ վաղ է խոսել ԵՏՄ-ի հետ մտերմության մասին:
Բացի դրանից՝ Բրյուսելում աղբյուրի պդմամբ՝ ԵՄ-ն դեռ չի պատրաստվում ընդունել որևէ որոշում՝ կապված պատժամիջոցների թուլացման հետ:
Ինչպես հայտնում է թերթը՝ Բրյուսելի հետ կապերը մոտ ապագայում մտադիր են վերանայել նաև ՌԴ ԱԳՆ-ում: «Կոմերսանտի» աղբյուրի խոսքով՝ «հարաբերությունների ներկայիս փուլը» Մոսկվային, որը կուզենար ԵՄ-ի հետ իրավահավասար գործընկերություն ԵՄ-ի հետ, հարմար չէ: Միաժամանակ ռուսական կողմը համոզված է, որ չի հաջողվի ԵՄ-ի հետ հարաբերությունները բարելավել՝ առանց պատժամիջոցների հիմնական մասը հանելու:
Մարտի 9-ին ԵՄ անդամ երկրների մշտական ներկայացուցիչների կոմիտեն հաստատել է Ռուսաստանի դեմ պատժամիջոցների երկարաձգումը: ՌԴ-ի և Ուկրաինայի քաղաքացի 146 ֆիզիկական անձանց և ռուսական 37 ընկերությունների նկատմամբ սահմանափակումները կգործեն մինչև 2016թ. սեպտեմբերի 15-ը:
