Կորեայի Հանրապետությունում գտնվող Հայաստանի Հանրապետության Ազգային ժողովի պատվիրակության անդամները մարտի 10-ին հանդիպել են Կորեայի Հանրապետության Ազգային ժողովի Կորեա-Հայաստան պատգամավորական բարեկամական խմբի ղեկավար Յունգ-մին Նոի հետ: Ինչպես տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, պատվիրակության ղեկավար Սամվել Ֆարմանյանը շնորհակալություն է հայտնել Յունգ-մին Նոին՝ Կորեայի Հանրապետություն այցի հրավերի համար և հույս է հայտնել, որ հայ-կորեական հարաբերությունները կշարունակեն զարգանալ խորհրդարանների միջև սերտ համագործակցության արդյունքում: Իր խոսքում Սամվել Ֆարմանյանը բարձր է գնահատել Յունգ-մին Նոի ջանքները` ուղղված հայ-կորեական միջխորհրդարանական համագործակցության ակտիվացմանը:
Հանդիպմանն անդրադարձ է եղել Հայոց ցեղասպանության խնդրին: Հայկական պատվիրակության անդամները կարևորել են պարոն Նոի ջանքերը` ուղղված Հայոց ցեղասպանության խնդրի բարձրաձայնմանը` վկայակոչելով նրա հեղինակած «Ժամանակակից ողբերգություն» գիրքը, որի առաջին գլխում անդրադարձ է կատարվում Հայոց ցեղասպանության խնդրին: Հանդիպման ընթացքում Սամվել Ֆարմանյանը պարոն Նոին փոխանցել է ապրիլին Երևանում կայանալիք «Ընդդեմ ցեղասպանության հանցագործության» երկրորդ գլոբալ ֆորումին մասնակցության հրավերը:
Սամվել Ֆարմանյանը նշել է, որ Հայաստանում մեծ հետաքրքրություն կա կորեական մշակույթի և լեզվի նկատմամբ, ինչի վկայությունն է նաև Երևանի Բրյուսովի անվան պետական լեզվահասարակագիտական համալսարանում կորեերեն լեզվի կենտրոնի գործունեությունը:
Կողմերն անդրադարձել են նաև երկկողմ առևտրատնտեսական, մշակութային կապերի ընդլայնման անհրաժեշտությանը:
Հանդիպման ընթացքում մտքեր են փոխանակվել Կորեական թերակղզում տիրող իրավիճակի, Լեռնային Ղարաբաղի հակամարտության, ինչպես նաև միջազգային այլ հիմնախնդիրների շուրջ: Կորեա-Հայաստան պատգամավորական բարեկամական խմբի ղեկավարը նշել է, որ Ղարաբաղյան հակամարտության լուծման հիմքում պետք է դրվի ժողովուրդների ինքնորոշման իրավունքը:
