MK-Turkey-ի փոխանցմամբ՝ ընդդիմադիր Zaman թերթը մեկ գիշերվա ընթացքում վերածվեց կառավարության ու պալատական մեկ մարդու քարոզչական գրքույկի։ Այդ մասին հայտարարել է գլխավոր ընդդիմադիր «Ժողովրդա-հանրապետական» կուսակցության (ԺՀԿ) խոսնակ Սելին Սաեկ Բյոքեն՝ մեկնաբանելով թերթի շուրջ ծավալված վերջին դեպքերը:
«Եթե իշխող «Արդարություն ու զարգացում» կուսակցությունը (ԱԶԿ) շարունակի նույն ոգով, ապա մոտ ժամանակներս անհնար կլինի Թուրքիան անվանել ժողովրդավարական երկիր, ինչի ապացույցն են իշխանությունների կողմից ընդդիմադիր ԶԼՄ-ների հանդեպ հաշվեհարդարները։
Կառավարությունը շարունակում է համառորեն գործնականում կիրառել ԶԼՄ-ները ճնշելու ապօրինի մեթոդներ։ Վերջին շաբաթվա ընթացքում կառավարությունը բաց ձևով խլեց ևս մեկ թերթ։ Այդպիսով ևս մեկով ավելացավ կառավարամետ թերթերի թիվը։
Իշխանությունների այդօրինակ գործողությունները դարձել են սովորական, իսկ իրադարձությունների հետագա զարգացումը՝ կանխատեսելի։ Նախ դատական մարմինները հանդես են գալիս որպես կառավարության գործիք և արգելք են դնում թերթի վրա։
Հաջորդ օրն այն լցվում է կառավարամետ բովանդակությամբ։ Մեկ գիշերվա ընթացքում թերթը վերածվում է կառավարությունն ու պալատը ներկայացնող մեկ մարդու քարոզչական գրքույկ։ Դրանից հետո վարչապետը առանց ամոթի դա որակում է որպես իրավական գործողություն»։
