ԱՄՆ նախագահ Բարաք Օբաման The Atlantic-ին տված հարցազրույցում ԱՄՆ դաշնակից Սաուդյան Արաբիային առաջարկել է Իրանի հետ «սառը խաղաղություն» և բացառել է Միացյալ Նահանգների օգնության տրամադրումը Էր-Ռիադին Թեհրանի հետ հակամարտության դեպքում:
Իրանը և Սաուդյան Արաբիան մերձարևելյան տարածաշրջանում ունեն լուրջ տարաձայնություններ: Մասնավորապես, Սիրիայի և Եմենի հակամարտություններում նրանք աջակցում են հակառակ կողմերի:
«1979 թվականից Իրանն ԱՄՆ-ի թշնամին է եղել և պետական մակարդակով աջակցել է ահաբեկչությանը: Նա Իսրայելի և մեր շատ դաշնակիցների համար իրենից ներկայացնում է իրական վտանգ, ցուցաբերում է ամեն հնարավոր կործանարար վարք»,- ասել է Օբաման, որի խոսքերով ԱՄՆ-ն չի պլանավորում լքել «ավանդական դաշնակցին»`Սաուդյան Արաբիային:
Ընդ որում, նրա խոսքերով՝ Սաուդյան Արաբիային հարկ կլինի «կիսել» տարածաշրջանն Իրանի հետ: «Սաուդցիների և իրանցիների միջև մրցակցությունը, որին սնում է «պատերազմը ուրիշների ձեռքերով» Սիրիայում, Իրաքում և Եմենում, պահանջում է, որ մենք ասենք մեր ընկերներին և իրանցիներին, որ նրանց հարկավոր է գտնել արդյունավետ միջոց տարածաշրջանը բաժանելու և սահմանելու ինչ-որ բան «սառը խաղաղության» պես»,- ասել է Օբաման:
«Պարսից ծոցում մեր գործընկերները, մեր ավանդական ընկերները հնարավորություն չունեն ինքնուրույն մարելու հրդեհը կամ ինքնուրույն վճռական հաղթանակ տանելու: Իսկ դա կնշանակի, որ մենք պետք է գանք և օգտագործենք մեր ռազմական հզորությունը գործերը կարգավորելու համար: Եվ դա ոչ միայն ԱՄՆ-ի հետաքրքրությունների շրջանակներում չէ, այլ նաև Մերձավոր Արևելքի»,- ասել է Օբաման:
