Ռուսական RIA Novosti լրատվական գործակալության փոխանցմամբ՝ Ռուսաստանն ու Ադրբեջանը պատասխանատու ու հուսալի գործընկերներ են ռազմատեխնիկական համագործակցության ոլորտում։ Այդ մասին Twitter-ի իր միկրոբլոգում գրել է Ռուսաստանի փոխվարչապետ Դմիտրի Ռոգոզինը.
«Բաքու կատարած այցի գլխավոր արդյունքն այն է, որ կողմերը հաստատեցին, որ պատասխանատու ու հուսալի գործընկեր են այնպիսի զգայուն ոլորտում, ինչպիսին որ ռազմատեխնիկական համագործակցության ոլորտն է»։
Ավելի վաղ հաղորդվել էր, որ Ռոգոզինն ու Ադրբեջանի նախագահ Իլհամ Ալիևը քննարկել են տնտեսական ու ռազմատեխնիկական ոլորտներում համագործակցության հարցը։
Ալիևը հայտարարել էր, որ երկու երկրների միջև շատ ոլորտներում իրականացվում է հաջող համագործակցություն։ Նա ընդգծել էր Ռուսաստանին մթերքների մատակարարման ոլորտում Ադրբեջանի աճող դերը։
Հիշեցնենք, որ սրանից առաջ հաղորդվել էր, որ Ադրբեջանը ֆինանսական խնդիրների պատճառով չի կարողացել ամբողջովին կատարել ավելի վաղ Ռուսաստանին պատվիրած 4 միլիարդ դոլարի զենքի համար վճարումը, և Ռոգոզինի այցը կապված է դրա հետ։
