2015 թվականին Հայաստան է այցելել 1.192.000 զբոսաշրջիկ: Չնայած Ցեղասպանության 100-ամյա տարելիցի առիթով զբոսաշրջիկների մեծ հոսքին՝ սա մեկ տոկոսով ցածր է նախորդ՝ 2014 թվականից: Հայաստանում զբոսաշրջիկների ամենամեծ հոսքը Ռուսաստանից է, հաջորդում են Վրաստանը, եվրոպական երկրները և Իրանը: Էկոնոմիկայի նախարարության զբոսաշրջության վարչության պետ Մեխակ Ապրեսյանը վստահեցնում է, որ Հայաստանում զբոսաշրջությունը ծաղկում է, մեր երկիրը օտարին հրապուրիչ դարձնելու համար ջանք չի խնայվում:
Նրա խոսքով՝ հատուկ ուշադրություն է հատկացվում հատկապես իրանցի զբոսաշրջիկներին: Իրան-Հայաստան-Վրաստան տուրեր են մշակել իրանցի այն զբոսաշրջիկների համար, որոնց այցելության վերջնանպատակը Վրաստանն է:
Մահմուդ Ալի Մուհամեդին Հայաստանում տուրիստական գործակալություն է հիմնել 13 տարի առաջ: Զբոսաշրջային տուրեր են կազմակերպում Իրանից Հայաստան և հակառակ ուղղությամբ: Իրանցի գործարարի խոսքով՝ տուրիզմի զարգացման համար պետությունը լուրջ քայլեր չի ձեռնարկում: Իրանցի զբոսաշրջիկները դա զգում են սեփական մաշկի վրա: Հայաստանի սահմանային անցակետում նույնիսկ ամենապարզ անցագրային ստուգումը ժամեր է տևում:
Իրանցի գործարարը Հայաստանը համարում է ցուցանակներից զուրկ երկիր: Զբոսաշրջիկները դժվարությամբ են կողմնորոշվում Երևանում, մարզերի մասին խոսք լինել չի կարող:
Հայաստանում խնդիր է նաև զբոսաշրջային ծառայությունների գինը: Չնայած կառավարության պնդմանը, թե՝ Հայաստանը զբոսաշրջիկի համար էժան և հարմարավետ երկիր է, զբոսաշրջության կազմակերպմամբ զբաղվող գործարարը փաստերով հակառակն է ապացուցում: Հայաստանում հյուրատների գները կայուն չեն: Երբ հոսքը Իրանից դեպի Հայաստան սկսում է շատանալ, հյուրատների գներն էժանանալու փոխարեն՝ ավելի են թանկանում:
Մահմուդ Ալի Մուհամեդի խոսքով՝ իրանցի զբոսաշրջիկը, որ նախատեսում էր Հայաստանում իքս գումարով, ասենք, մնալ 10 օր, 3 օրից վերադառնում է տուն:
Հայաստանը, սակայն, ունի տարածաշրջանի մյուս երկրներից մի կարևոր առավելություն՝ զբոսաշրջիկներն այստեղ իրենց ապահով են զգում:
Իրանցի զբոսաշրջիկները հայտնում են.
«Ինձ օտար չեմ զգում այստեղ: Շատ իրանցիներ կան: Այնպիսի տպավորություն է, թե շատ հարազատ միջավայրում եմ: Այստեղ ամենուրեք ապահով է, ոստիկանները հսկում են: Հիմնական խնդիրն այն է, որ ձեր դրամի արժեքը չգիտենք ու երբեմն չենք հասկանում՝ մեզ վրա այդ ծառայությունը թա՞նկ հաշվեցին, թե՞ էժան»:
«Ես շրջել եմ Կասկադում, Օպերայում: Հետաքրքիր հիշողություններ ունեմ նաև Ծաղկաձորի հետ կապված: Ինձ օտար չեմ զգում: Բայց այստեղ կա լեզվի խնդիր, շատերը անգլերեն չեն հասկանում: Քանի որ իրանցիները շատ են այցելում, ես առաջարկում եմ, որ ձեզ մոտ գոնե մի քանի ցուցանակ լինի պարսկերեն: Իրանի իմ ընկերներին խորհուրդ կտամ գոնե մեկ անգամ այցելել՝ Հայաստանը տեսնելու: Գեղեցիկ երկիր է»: