Հայաստանի Հանրապետական կուսակցության մամուլի խոսնակ, ԱԺ փոխխոսնակ Էդուարդ Շարմազանովը ծանոթացել է «Բարգավաճ Հայաստան» կուսակցության ղեկավար Գագիկ Ծառուկյանի հարցազրույցին, և չնայած նշում է, որ այն հիմնականում հավասարակշռված քաղաքական գործչի հարցազրույց էր՝ կոռեկտ շեշտադրումներով և զերծ կոշտ ձևակերպումներից, այնուամենայնիվ, նրա մոտ երկու հարց առաջացել է։
«Առաջինը՝ եթե Ազգային անվտանգության խորհրդի անդամ Գագիկ Ծառուկյանը խոսելով պետության առջև ծառացած խնդիրների մասին հարց է տալիս, թե որտե՞ղ են դրանք քննարկվում՝ միջանցքներում, կոնֆերանսներում, թե միջկուսակցական քննարկումներում և նրա համար տեսանելի չէ, թե որտեղ են քննարկում, ապա ես կարծում եմ, որ եթե, նախևառաջ, մեր հարգարժան գործընկերն ավելի հաճախակի այցելեր և մասնակցեր Անվտանգության խորհրդի նիստերին, ավելի քաջատեղյակ կլիներ»,- լրագրողների հետ զրույցում ասել է ԱԺ փոխխոսնակը։
Շարմազանովն ընդգծեց, որ կոնկրետ ՀՀԿ գործադիր մարմինը՝ նախագահի գլխավորությամբ, յուրաքանչյուր կարևոր հարց քննարկում է կուսակցության խորհրդում։ «Թե մնացած կուսակցությունները ո՞նց են քննարկում, դա արդեն այդ կուսակցության և ժողովրդավարության սկզբունքն է»,- ասաց նա։
ՀՀԿ մամուլի խոսնակի հաջորդ տարակուսանքը վերաբերվում էր նրան, որ Գագիկ Ծառուկյանն ասել էր՝ «Քանի որ ԲՀԿ-ն այլևս Կառավարության մաս չէ, ուստի պատասխանատվություն չունի այդ Կառավարության գործունեության համար»։
«Ես կարծում եմ, եթե այդպես է, ուրեմն ավելի ազնիվ կլիներ, որպեսզի ոչ միայն բարգավաճական մարզպետները, նախարարները, փոխնախարարները հրաժարական տան, այլ այն մարդիկ, ովքեր պետական կառույցներում աշխատում ու ներկայացնում են «Բարգավաճ Հայաստան» կուսակցությունը։ Հստակեցնեին, հիմա իրենք պատասխանատո՞ւ են իրենց գործունեության համար, թե չէ»,- ասաց նա։
Դիտարկմանը, թե Գագիկ Ծառուկյանը նաև ասել է, որ դասական իմաստով քաղաքական դաշտ չկա, և խոսել է ընդդիմության և իշխանության անհանդուրժողականության մթնոլորտի մասին, ԱԺ փոխխոսնակը պատասխանեց. «Անհանդուրժողականության մթնոլորտը, եթե համեմատենք 2008-ի հետ, մենք ունեցել ենք ավելի դրական տեղաշարժ, նաև ընտրական պրոցեսում, բայց, իհարկե, այստեղ կան անելիքներ։ Ինչ վերաբերում է դասական քաղաքականությանը, ապա մենք կունենանք դասական քաղաքական մշակույթ, երբ բացառապես քաղաքական գործիչները կզբաղվեն քաղաքականությամբ»,- նշեց նա։
