Մեր զրուցակիցն է ՄԻՊ թեկնածու, արդարադատության փոխնախարար Արման Թաթոյանը:
– Պարոն Թաթոյան, որոշակի անվստահություն կա արդեն իսկ՝ կապված Ձեր գործունեության հետ: Այս պայմաններում ինչպե՞ս եք պատրաստվում աշխատել:
– Համաձայն չեմ ձեզ հետ, որ անվստահություն կա, վաղը քննարկումներն ավելի մանրամասն ցույց կտան ամեն ինչ: Դեռ քնարկումների փուլն է ընթանում: Դեռևս վերջնական դիրքորոշում չկա: Եվ դեռ ես պետք է իմ եզրափակիչ խոսքն ասեմ, բոլոր պատգամավորների եզրափակիչ խոսքը պետք է լսենք: Այնպես որ, դեռ պրոցես է ընթանում:
– Վստա՞հ եք, որ ՀՀ մարդու իրավունքների նախորդ երկու պաշտպանների նախադեպը Ձեր դեպքում չի կրկնվի: Նրանք որոշակի քայլերում դեմ գնացին իշխանության ցանկությանը, կարծիքին և պաշտոնանկ եղան:
– Այո՛, կլինեն բարդություններ, դրանից որևէ մեկը չի խուսափում և չի հրաժարվում, բայց իմ ներկայացրած սկզբունքները (դրա համար եմ խնդրում մեկ անգամ ևս նայել), կարծում եմ, կնպաստեն նրան, որ բարդությունները հաղթահարվեն:
– Հայաստանում քաղբանտարկյալներ եղե՞լ են և կա՞ն:
– Եվրոպական դատարանը հատուկ ընդգծել է, որ յուրաքանչյուր դեպքում գնահատական տալու համար պետք է գործի հանգամանքները մանրակրկիտ ուսումնասիրել: Նորից ասեմ՝ ՄԻՊ-ի մասին օրենքը պաշտպանին, էլ չեմ ասում ՄԻՊ թեկնածուին, պարտավորեցնում է գնահատական տալ բացառապես այն դեպքում, երբ հատուկ ընթացակարգով քննարկել է բողոքը: Այլ հնարավորություն չկա: Ընդ որում՝ Մարդու իրավունքների պաշտպանի մասին օրենքը չափազանց կարևոր դրույթ ունի, որտեղ նշված է, որ պաշտպանը որևէ հարցի վերաբերյալ գնահատական տալուց առաջ պարտավոր է պարզապես հնարավորություն ընձեռել այն պետական մարմնին, որի գործողություները բողոքարկվում են, դիրքորոշում արտահայտելու և փորձելու հիմնավորել իր դիրքորոշումը, դրանից հետո միայն գնահատականներ տալ: Հիմա այս պայմաններում, խնդրում եմ՝ ինձ ասեք, ո՞ր իրավական հիմքով ՄԻՊ-ը կարող է, ասենք, այս կամ այն հայտարարություն անել: Այդ մասին մանրամասն նշել եմ:
– Դուք պատրա՞ստ եք, որպես մարդու իրավունքների պաշտպան, պարզել, ի վերջո, Հայաստանում եղե՞լ են և կա՞ն քաղբանտարկյալներ, թե՞ ոչ:
– Եթե կոնկրետ հարցեր կլինեն, քննարկումներ կլինեն և այլն, իհարկե, ինչի մասին է խոսքը, եթե, իհարկե, իրավասությանն է առնչվում:
