Վերջին օրերին ադրբեջանցի քարոզիչները ջանք ու եռանդ չեն խնայում հայ-ադրբեջանական սահմանում զոհված ազգությամբ եզդի զինծառայողներին որպես ահաբեկիչներ ներկայացնելու համար և կեղծ տեղեկություններ են տարածում իբր Հայաստանի Հանրապետությունում ազգային փոքրամասնությունների, մասնավորապես` եզդիական համայնքի նկատմամբ կիրառվող ճնշումների վերաբերյալ:
Նման կեղծիքի տարածումը ուղղված է ոչ միայն եզդի ժողովրդի դեմ, այլև պետական մակարդակով հայերի հանդեպ Ադրբեջանում արմատավորված ատելության մթնոլորտի տարածման նպատակ ունի:
Ի տարբերություն Ադրբեջանի՝ Հայաստանում բնակվող ազգային փոքրամասնությունների նկատմամբ որևէ բռնաճշում, որևէ խտրականություն չի կիրառվում: Հայ ու եզդի ժողովուրդները դարավոր բարեկամներ են, ու այսօր էլ ՀՀ-ում բնակվում է մոտ 60 հազար եզդի: Ի տարբերություն աշխարհի շատ երկրների` Հայաստանում եզդիների իրավունքները պաշտպանված են օրենքով: 32 դպրոցներում դասավանդվում է եզդիերեն, համայնքն ունի եզդիերեն ռադիոհեռարձակման ժամեր:
Եզդի ժողովրդի զավակները հայ ժողովրդի և Հայաստանում բնակվող ազգային այլ փոքրամասնությունների` եզդի, ասորի, հույն, քուրդ, ռուս, հրեա, լեհ, ուկրաինացի քաղաքացիների հետ միասին մասնակցում են Հայաստանի զարգացմանն ու հզորացմանը: Մեծ է եզդի ժողովրդի ներդրած ավանդը Արցախյան ազատամարտում, նրանց մասնակցությունը ՀՀ և Արցախի սահմանների պաշտպանությանը: Արցախյան պատերազմի տարիներին եզդիների 500 հոգանոց ջոկատը կանգնած է եղել հայ ժողովրդի կողքին, և այսօր էլ եզդի պատանիները, որպես Հայաստանի Հանրապետության լիիրավ քաղաքացիներ, ազգային փոքրամասնությունների այլ ներկայացուցիչների հետ միասին պատվով ծառայում են զինված ուժերում:
Վստահ ենք, որ ինչպես Հայաստանի ամեն քաղաքացի, այստեղ ազատորեն բնակվող եզդիները պատրաստ են Հայկական բանակի զինվորների հետ միասին պաշտպանել սահմանները թշնամիների հարձակումներից և ոտնձգություններից:
Աշխարհի և Հայաստանի եզդիների մության նախագահ
Ազիզ ԹԱՄՈՅԱՆ
