Ինչպե՞ս եք վերաբերվում այն հանգամանքին, որ Վրաստանում իշխող կուսակցությունը բավականին հետաքրքիր նախադեպով հանդես եկավ և աշնանը կայանալիք նախագահական ընտրություններում առաջադրեց իրենց կրթության և գիտության նախարար Գեորգի Մարգելաշվիլու թեկնածությունը` «Հրապարակ»-ը հարցնում է նրա հայաստանյան կոլեգային՝ Արմեն Աշոտյանին: «Քանի որ մեծ քաղաքական ցիկլն արդեն ավարտվել է, ես որոշել եմ այլևս չմեկնաբանել ընթացիկ կամ երկրորդական` հարհայաստանյան կամ հարքաղաքական իրադարձությունները»:
Խոսքը հարվրացականի մասին է՝ հիշեցնում է լրագրողը. «Կարծում եք այլ պետության բարձրաստիճան պաշտոնյան պետք է իրեն իրավունք վերապահի և մեկնաբանի մեկ այլ պետության իշխող կուսակցության և վարչապետի որոշո՞ւմը»: Եվ այնուհանդերձ` ողջունո՞ւմ եք նման մոտեցումը: «Ես չեմ միջամտում հարևան և հեռավոր երկրների ներքին քաղաքականությանը»: Իսկ ինչպե՞ս եք գնահատում Ձեր աշխատանքն ընտրությունների ժամանակ` քարոզչության բնագավառում. հնարավո՞ր է դա էր պատճառը, որ ԲՀԿ լիդերը վերջապես ասաց, որ իրենք այլևս ընդդիմություն չեն, և հետո` ինչո՞ւ Ձեզ չէին հրավիրել «Փարավոնում» ընթրելու: «Չենք պատասխանում այդ և մնացած հարցերին. ինչու` պատճառն արդեն ասացի»:
