«Առաջին լրատվական»- ի հետ հեռախոսազրույցում իրավապաշտպան Արթուր Սաքունցն անդրադարձավ վերջին օրերին երկու զինծառայողների մահվան դեպքերին.
«Մենք բազմաթիվ անգամ տարբեր տարիների ընթացքում երբ որ ահազանգում էինք զինվորական ծառայության ընթացքում ծագած խնդիրների, և դրանց բուն պատճառների մասին, նշում անկախ քննության մեխանիզմների անհրաժեշտության մասին, այսինքն ՝ մենք համակարգային բազմաթիվ հարցեր էինք բարձրացնում, և մշտապես Պաշտպանության նախարարությունը պատասխանում էր, որ այս տարի, ի տարբերություն նախորդ տարվա, ջանքեր են գործադրվում, որ այդ խախտումները վերացվեն:
Մենք միշտ գործ ենք ունենում հետևանքների դեմ պայքարի հետ, այլ ոչ թե բուն պատճառների վերացման կամ պատճառների առաջացմանը, դրանց գոյության հիմքերը հանդիսացող պատճառների վերացման ուղղությամբ ինստիտուցիոնալ բարեփոխումների հետ: Եվ պարբերաբար այդ ոչ բովանդակային բարեփոխումների հետևանքները դուրս են հորդում դժբախտ պատահարներով:
Երկու օրվա ընթացքում՝ մի դեպքում ինքնասպանության հասցնելու փաստ կա, չնայած դա առայժմ պաշտոնական վարկածն է, մյուս դեպքում՝ ծառայակցին սպանելու, այնուհետև ինքնասպան լինելու փաստը կա. վարչական ռեսուրսի կիրառմամբ լուծումները չեն կարող արդյունք ունենալ»:
