Այսօր ՀՀ ԱԺ «Ժառանգություն» խմբակցությունում տեղի է ունեցել Մարդու իրավունքներ պաշտպանի աշխատակազմի կողմից մշակված «Խտրականության մասին» օրենքի նախագծի քննարկում: Քննարկմանը ներկա էին «Ժառանգություն» խմբակցության ղեկավար Ռուբեն Հակոբյանը, քարտուղար Զարուհի Փոստանջյանը, խմբակցության փորձագետ Ոսկեհատ Իսախանյանը, «Արեգ» գիտավերլուծական կենտրոնի, Երեւանի Պետական Համալսարանի աստվածաբանության ամբիոնի, խնդրով շահագրգիռ հասարակական կազմակերպության, Մարդու իրավունքների պաշտպանի աշխատակազմի ներկայացուցիչներ:
Հանդիպման ժամանակ քաղաքացիական հասարակության ներկայացուցիչները ներկայացրել են «Խտրականության մասին» օրենքի նախագծի վերաբերյալ իրենց մտահոգությունները և առաջարկությունները:
Մարդու իրավունքների պաշտպանի գրասենյակի աշխատակիցները տեղեկացրել են, որ կարծիք ստանալու նպատակով օրենքի նախագիծը արդեն ուղարկվել է Վենետիկի հանձնաժողով:
Հանդիպման վերջում խմբակցության ղեկավարը ներկաներին տեղեկացրել է, որ հիշյալ հարցի առնչությամբ «Ժառանգություն» խմբակցությունը պատրաստ է հետագայում ավելի ընդլայնված քննարկումներներ կազմակերպել՝ խնդրով հետաքրքրվող բոլոր հասարակական-քաղաքական կազմակերպությունների ներկայացուցիչների կարծիքներն ու առաջարկություններն ուսումնասիրելու համար:
