Twitter միկրոբլոգների ծառայությունը 2 նոր գործառույթ է թողարկում բիզնես վարելու համար՝ թվիթներից անձնական հաղորդագրությունների հղումներ և Customer Feedback հաճախորդների հարցման ծառայություն: Այս մասին gazeta.ru-ին հայտնել են ընկերության մամլո ծառայությունում:
«Ոչ հազվադեպ օգտատերերի և ապրանքանիշերի շփումը հաճախորդների աջակցության շրջանակներում սկսվում է թվիթներով, իսկ հետո, երբ խոսքն անձնական տեղեկության հաղորդման մասին է լինում, փոխանցվում է անձնական հաղորդագրությունների: Հիմա այդ անցումն անել կարելի է մեկ քլիքով»,- նշում են ընկերությունում:
Նոր գործառույթն ապրանքանիշերին հնարավորություն կտա թվիթներին հղումներ ավելացնել: Օգտատերերը «Անձնական հաղորդագրություն ուղարկել» կոճակը կտեսնեն հենց Twitter-ում նամակագրության մեջ:
Եվս մեկ գործառույթ ներդրվում է, որպեսզի ապրանքանիշերը հնարավորություն ունենան օգտատերերի շրջանում հարցումներ կատարել: Customer Feedback ծառայությունն ապրանքանիշերին հնարավորություն կտա օգտագործել 2 ստանդարտ ոլորտային ձևաչափ՝ հավատարմության ինդեքս NPS (Net Promoter Score) և հաճախորդների բավարարվածության ինդեքս (CSAT):
