Իրանական կողմը պատրաստակամ կլինի գազ տրամադրել Հայաստանին. այսօր լրագրողների հետ հանդիպման ժամանակ ասաց Գործատուների հանրապետական միության ղեկավար Գագիկ Մակարյանը՝ անդրադառնալով գազի գնի թանկացման մասին քննարկումներին:
Նա նշեց, որ ռուսական գազից հրաժարվելու տարբերակ է իրանական գազը: Սակայն, ըստ նրա, դա քաղաքական խնդիր է, թեև իրանական կողմը պատրաստակամ է՝ մանավանդ Իրանի տնտեսությունն այնպիսի իրավիճակում է, որ այդ երկիրն ուրախ կլինի իր հնարավորությունները օգտագործել, սակայն այստեղ առկա է Ռուսաստանի հարցը:
Հարցին՝ «ՀայՌուսգազարդ»-ի կողմից գազի սակագնի թանկացումը քաղաքակա՞ն, թե՞ տնտեսական հարց է, Գագիկ Մակարյանը պատասխանեց՝ Ռուսաստանը քաղաքական երկիր է, բայց գազի գնի բարձրացումը քաղաքական ենթատեքստեր չունի, հիմքերը պետք է տեսնել Հայաստանում: «Մեր երկիրը իր զարգացմամբ խոցելի է, ուստի որքան էլ համարվի բարեկամ երկիր, կարող է մանիպուլյացիաներ լինեն և օգտվեն իրավիճակից»,- նկատեց Գագիկ Մակարյանը:
Հիշեցնենք, որ «ՀայՌուսգազարդի» կողմից Հանրային ծառայությունները կարգավորող հանձնաժողովին ներկայացված հայտում որպես նոր գին (մինչև 10 հազ. խ/մ գազ սպառողների համար) ֆիքսված է 221 000 դրամը` յուրաքանչյուր 1000 խ/մ-ի դիմաց (կամ 221 դրամը` 1 խ/մ-ի դիմաց), այսինքն` թանկացումը կազմում է մոտ 67 %: ՀՀ կառավարության նիստի ժամանակ վարչապետ Տիգրան Սարգսյանը հայտարարեց, որ գազի թանկացման 30 տոկոսը կառավարությունը վերցնելու է իր վրա:
Լուսանկարը՝ PanARMENIAN Photo-ի