Ադրբեջանական Trend լրատվական գործակալության փոխանցմամբ՝ Ադրբեջանի նախագահ Իլհամ Ալիևն այսօր հանդիպել է Թուրքիայի արտգործնախարար Մևլյութ Չավուշօղլուի հետ։ Հանդիպման ժամանակ Ալիևը Անկարայի ահաբեկչության կապակցությամբ ցավակցել է Չավուշօղլուին։
Ալիևը դատապարտել է այդ ահաբեկչությունը՝ հայտարարելով, որ Թուրքիայի նախագահ Ռեջեփ Էրդողանը երեկ երեկոյան հեռախոսազրույց է ունեցել իր հետ և հայտնել է, որ Անկարայի ահաբեկչության պատճառով չի կարող ժամանել Բաքու. «Բնականաբար, մենք հասկանում ենք դա»։
Ալիևը հավելել է, որ Էրդողանի հետ պայմանավորվել է, որ Թուրք-ադրբեջանական բարձր մակարդակի ռազմավարական համագործակցության խորհրդի հերթական նիստը կանցկացվի Թուրքիայի նախագահին հարմար ժամանակում։
Ալիևն այդ խորհրդի կարևորությունն ընդգծել է երկկողմ հարաբերությունների հետագա ընդլայնման տեսանկյունից։ Նա վստահություն է հայտնել, որ խորհրդի նիստը, որի օրակարգում ներառված են բազում թեմաներ, կանցկացվի մոտ ժամանակներս։
Չավուշօղլուն նույնպես վստահություն է հայտնել, որ խորհրդի նիստը տեղի կունենա մոտ ժամանակներս։
