Իսրայելը չի ցանկանում միջամտել ներսիրիական հակամարտությանը, սակայն կխոչընդոտի զենքի փոխադրմանը լիբանանցի գրոհայիններին, իսկ Սիրիայի կողմից հարձակման դեպքում իսրայելական պատասխանը կկարողանա ազդել հակամարտության ընթացքի վրա: Ինչպես հաղորդում է RIA Novosti-ն, այս մասին հայտարարել է Իսրայելի ԱԳ նախարարի տեղակալ Զեև Էլկինը:
«Ընդհանուր առմամբ իսրայելական դիրքորոշումը կայանում է նրանում, որ մենք չենք միջամտում Սիրիայի ներքին մարտերին, սակայն ունենք «կարմիր գիծ»՝ մեր քաղաքացիների անվտանգությունը»,- ասել է Էլկինը:
Նրա խոսքերով՝ Իսրայելը չի հանդուրժի, որ Սիրիայի միջով զենք փոխանցվի «Հըզբոլլահ» լիբանանյան շարժմանը: Էլկինը նշել է, որ նոր տեսակի զենքը կարող է փոխել անվտանգության ոլորտում ստեղծված իրավիճակը, և իրենք ամեն ինչ կանեն դա թույլ չտալու համար:
«Հասկանալի է, որ եթե Սիրիան թույլ տա իրեն անուղղակի կերպով կամ միջնորդավորված հարձակվել մեզ վրա, ապա մենք ստիպված կլինենք պատասխանել, և դա կարող է ազդել ներքին հակամարտության վրա… Մենք չենք ցանկանում միջամտել, սակայն պատրաստ չենք ռիսկի ենթարկել մեր քաղաքացիների անվտանգությունը հանուն չմիջամտելու սկզբունքի»,- հավելել է նա:
