Google ընկերությունը վարձում է որակյալ մասնագետների՝ սեփական արտադրության «անօդաչու» մեքենաներ ստեղծելու համար:
Ընկերությունը փնտրում է ինժեներների, որոնք մեքենաշինության ոլորտում կունենան պատկառելի փորձ: Ավելի վաղ Google-ը հերքում էր «անօդաչու» մեքենաների սեփական անկախ արտադրություն սկսելու մտադրության մասին լուրերը՝ պնդելով, որ ընկերության ծրագրերի մեջ են մտնում միայն գործընկերային համաձայնությունները արդեն իսկ գոյություն ունեցող խոշորագույն ավտոկոնցեռնների հետ:
Այնուհանդերձ, դատելով ընկերության կադրային փնտրտուքներից, Google-ը մտադիր է ստեղծել մեքենա՝ սեփական ապրանքանիշով: Օրինակ՝ ընկերությանն անհրաժեշտ է ինժեներ-տեխնոլոգ՝ արտադրական գործընթացի կարգավորման համար: Բացի այդ, Google-ը փնտրում է ձայնամեկուսացման ոլորտի մասնագետների և ինժեներ-մեխանիկների:
Հարկ է նշել նաև, որ նախագծի մշակմամբ զբաղվում է Hyundai ավտոկոնցեռնի ամերիկյան մասնաճյուղի նախկին ղեկավարը՝ մարդ, որն անմիջականորեն ծանոթ է մեքենաշինության գործին: Այս մասին հաղորդում է GoGetNews կայքը:
