Համայն Ռուսիո պատրիարք Կիրիլն ու Հռոմի պապ Ֆրանցիոսկոսը ուրբաթ օրը՝ փետրվարի 12-ին, Կուբայում պատմական հանդիպման արդյունքներով ստորագրել են համատեղ հռչակագիր:
Երկու եկեղեցիների առաջնորդների հանդիպումը տևել է երկու ժամից փոքր-ինչ ավելի:
Նրանք հայտարարել են, որ չի կարելի անտարբեր մնալ միլիոնավոր ներգաղթյալների ու փախստականների ճակատագրի հանդեպ, ովքեր «թակում են հարուստ երկրների դռները»:
«Մեր հայացքն ուղղված է ծանր վիճակում գտնվող, ծայրահեղ կարիքի ու աղքատության մեջ ապրող մարդկանց՝ այն դեպքում, երբ մարդկության նյութական հարստություններն աճում են: Մենք չենք կարող անտարբեր մնալ միլիոնավոր ներգաղթյալների ու փախստականների ճակատագրի հանդեպ, ովքեր թակում են հարուստ երկրների դռները»,- ասվում է նրանց համատեղ հռչակագրում:
Երկու հոգևոր առաջնորդները միջազգային հանրությանը կոչ են արել կանխել Մերձավոր Արևելքում քրիստոնյաների ճնշումը:
«Մեր հայացքը հառած է նախևառաջ աշխարհի այն տարածաշրջաններին, որտեղ քրիստոնյաները հալածանքների են ենթարկվում: Մերձավոր Արևելքի և Հյուսիսային Աֆրիկայի շատ երկրներում քրիստոնյա մեր եղբայրներն ու քույրերը կործանվում են ընտանիքներով, գյուղերով ու քաղաքներով: Նրանց տաճարները ենթարկվում են բարբարոսական կործանման ու կողոպուտի, սրբատեղիները պղծվում են, հուշարձանները՝ ոչնչացվում: Սիրիայում, Իրաքում և Մերձավոր Արևելքի այլ երկրներում մենք մեծ ցավով ականատես ենք լինում քրիստոնյաների զանգվածային ելքի այն հողից, որտեղից սկսվել է մեր հավատքի տարածումը, և որտեղ նրանք ապրել են առաքելական ժամանակներից՝ այլ կրոնական համայնքների հետ»,- ասվում է տեքսում:
Համայն Ռուսիո պատրիաք Կիրիլն ու Հռոմի պապ Ֆրանցիոսկոսը միջազգային հանրությանը կոչ են անում դիմել «անհապաղ գործողությունների՝ Մերձավոր Արևելքից քրիստոնյաների հետագա դուրսմղումը կանխելու համար»:
Հոգևոր հովիվները դեմ են հանդես եկել նաև աբորտներին ու էվթանազիային, ինչպես նաև պաշտպանել են ավանդական ընտանիքը:
Նրանք ցավում են, որ այժմ համակեցության այլ ձևերը հավասարվում են ընտանեկան միության հետ, «իսկ աստվածաշնչյան ավանդությամբ լուսավորված հայրության և մայրության մասին պատկերացումները՝ որպես տղամարդու և կնոջ հատուկ կոչում ամուսնության մեջ, դուրս են մղվում հասարակությունից»:
