Ադրբեջանական Turan լրատվական գործակալության փոխանցմամբ՝ Բաքվի շրջանային դատարանը Արիֆ և Լեյլա Յունուս ամուսիններին չի թույլատրել բուժման նպատակով մեկնել արտերկիր։ Այդ մասին հայտարարել է նրանց փաստաբան Էլչին Սադիգովը։
Նրա խոսքով՝ Լեյլա Յունուսը տառապում է քրոնիկ հեպատիտից, զարկերակային հիպերտենզիայից, շաքարային դիաբետից։ Նա նաև լեղապարկում քարեր ունի, ինչը տանջալից ցավերի պատճառ է դարձել, և անհրաժեշտ է շուտափույթ վիրահատություն։
Արիֆ Յունուսն իր հերթին տառապում է կյանքի համար վտանգավոր զարկերակային հիպերտենզիայից և ուժգին ցավեր ունի պարանոցի շրջանում։ Փորձագետների կարծիքով՝ նա կարիք ունի որակյալ բուժօգնության։ Փաստաբանը դատարանի որոշումը հայտարարել է որպես ապօրինի՝ ընդգծելով, որ կբողոքարկի այն:
