Արդարադատության նախարարության աշխատակազմի օրինականության վերահսկողության տեսչության կողմից այս տարվա ընթացքում նախատեսվում է իրականացնել 33 ստուգում՝ 15 հիմնադրամներում, 8 հասարակական կազմակերպություններում և տասը կուսակցությունում:
Առաջիկայում ՀԿ-ները, հիմնադրամները պետք է պատասխանեն տեսչության մի շարք հարցերի, որոնց հիմնական մասը թերևս վերաբերում է վերջիններիս գործունեությանը, իրավաբանական հասցեին և ֆինանսական հոսքերին։
Երևանի մամուլի ակումբի նախագահ Բորիս Նավասարդյանը, սակայն, այս ստուգումներն ավելորդություն է համարում՝ նկատում, որ այն հարցերը, որոնք հիմնականում առաջադրվելու են ՀԿ-ներին ու հիմնադրամներին, ավելի շատ այլ գերատեսչության իրավասության շրջանակներում է։
Ըստ բանախոսի՝ այս ստուգումներից հետո, եթե միտում նկատվի, որ ստուգման են ենթարկվում այն ՀԿ-ները, կամ հիմնադրամները, որոնք մի փոքր ավելի քննադատական դիրքերից են հանդես գալիս, ապա կարելի է ասել, որ դրանք նաև քաղաքական աստառ են պարունակում։
Կուսակցություններում ստուգման ժամանակ պետք է պարզվի արդյո՞ք, տվյալ քաղաքական միավորը պետական գրանցման պահից վեց ամիս հետո ունի օրենքով նախատեսված 2000 անդամ, արդյո՞ք, այն ՀՀ յուրաքանչյուր մարզում ունի առնվազն 100 անդամ, արդյո՞ք Հայաստանի բոլոր մարզերում ունի տարածքային ստորաբաժանում, արդյո՞ք Երևանում ունի տարածքային ստորաբաժանում և այլն։ Ընդ որում, ստուգման ենթակա կուսակցություների ցանկում ընդգրկված են այնպիսի կուսակցություններ, որոնք հանրությանը գրեթե ծանոթ չեն։ Ստուգման ենթակա կուսակցություններից առավել ծանոթ է Սոս Գիմիշյանի ղեկավարած «Քրիստոնեա-ժողովրդական վերածնունդ» և Արամ Հարությունյանի «Ազգային համաձայնություն» կուսակցությունները։ Վերջիններս «Առաջին լրատվական»-ի հետ զրույցում ասացին, որ ստուգումների տակ քաղաքական ենթատեքստ են տեսնում, որի մասին կհայտարարեն առաջիկայում։
