ԱՄՆ իշխանությունները կարծում են, որ քրդերի հանդեպ Թուրքիայի դիրքորոշումը հիմնական խոչընդոտներից մեկն է Սիրիայում քաղաքական կարգավորման ճանապարհին և լուրջ արգելք՝ ԴԱԻՇ-ի դեմ պայքարում: Այս մասին հայտնում է The Wall Street Journal-ը:
«Ամերիկացի պաշտոնյաների խոսքով՝ Թուրքիայի թշնամական վերաբերմունքը Սիրիայում քուրդ մարտիկների հանդեպ, որոնք ԱՄՆ-ի առավել արդյունավետ դաշնակիցների թվում են ԴԱԻՇ-ի դեմ պայքարում, խաթարում է այդ ծայրահեղական խմբավորման դեմ ավելի ինտենսիվ ռազմական գործողություններին ուղղված ջանքերը»,- նշում է պարբերականը:
Թերթը նշում է, որ Անկարան արդեն բազմիցս Վաշինգտոնին հայտարարել է, որ Սիրիայում ԱՄՆ քուրդ դաշնակիցները զենք են փոխանցում Քրդստանի աշխատավորական կուսակցությանը, իսկ նրանք, իրենց հերթին, այն կիրառում են Թուրքիայի տարածքում: Ամերիկյան իշխանություններն այդ պնդումները անհիմն են համարում:
Պարբերականը նշում է, որ այս թեման բարձրացվել է վերջերս ԱՄՆ փոխնախագահ Ջոզեֆ Բայդենի՝ այդ երկիր այցի ընթացքում: Ըստ թերթի՝ Բայդենի հետ հանդիպումներից հետո «թուրք պաշտոնատար անձինք The Wall Street Journal-ին ասել են, որ իրենք պատրաստ են ռմբակոծել Սիրիայում ամերիկացի դաշնակիցներին, եթե մատակարարումները շարունակվեն»:
«ԱՄՆ կենտրոնական մի շարք պաշտոնյաներ ասում են, որ Թուրքիայի դիրքորոշումը դարձել է ամենամեծ խոչընդոտներից մեկը Սիրիայում արդեն 5 տարի շարունակվող հակամարտության քաղաքական կարգավորման, նաև ԴԱԻՇ-ի դեմ արդյունավետ ռազմական արշավ իրականացնելու ճանապարհին»,- նշվում է հոդվածում:
Կիրակի Թուրքիայի նախագահ Ռեջեփ Թայիփ Էրդողանը հայտարարել է, որ ներկայումս նկատվում է վստահության նվազում Անկարայի և Վաշինգտոնի միջև՝ վերջինիս կողմից սիրիացի քրդերին աջակցության պատճառով:
