Սիրիայի զորքերը ուրբաթ օրը երկրի տարբեր շրջաններում հարվածներ են հասցրել գրոհայիններին: Տասնյակ ապստամբներ ոչնչացված են: Այս մասին հաղորդում է ՍԱՆԱ գործակալությունը:
Միաժամանակ աշխարհի տարբեր մայրաքաղաքներում քննարկվում է Սիրիայի վերաբերյալ միջազգային համաժողով անցկացնելու հարցը: Ինչպես հայտարարել է ՄԱԿ-ի գլխավոր քարտուղար Պան Գի Մունը, Լախդար Բրահիմին համաձայնել է մնալ Սիրիայի հարցով ՄԱԿ-ի և ԱՊԼ-ի հատուկ պատվիրակ: Նա կօգնի համաժողովի նախապատրաստական աշխատանքներին, որը առաջարկել են ԱՄՆ-ը և Ռուսաստանը:
Մեծ Բրիտանիայի վարչապետ Դևիդ Քեմերոնը ՌԴ նախագահ Վլադիմիր Պուտինի հետո բանակցություններից հետո ասել է, որ կողմերը կիսում են դիրքորոշումը, համաձայն որի՝ անհրաժեշտ է դադարեցնել Սիրիայում զինված հակամարտությունը:
«Մենք ողջունում ենք Սիրիային նվիրված միջազգային համաժողով կազմակերպելու առաջարկությունը: Դա հնարավորություն է կտա համատեղ կարգավորման միջոցներ փնտրել: Պետք է խուսափել հակամարտության հետագա զարգացումներից»,- Վարշավայում ասել է Գերմանիայի արտգործնախարար Գիդո Վեսթերվելեն:
Այս առումով Ֆրանսիայի արտգործնախարարությունը հայտարարել է, որ հակամարտության կարգավորման քաղաքական տարբերակը բացառում է Սիրիայի նախագահ Բաշար Ասադի հետագա կառավարումը:
Իսկ Կիպրոսի հաղորդակցության նախարար Տասոս Միցոպուլոսն ասել է, որ հանրապետության կառավարությունը ստուգել է նավահանգստի պատրաստվածության աստիճանը, եթե Սիրիայի քաղաքացիներին ստիպված լինեն տարհանել ԵՄ և այլ երկրներ:
