Հունաստանի ոստիկանությունն արցունքաբեր գազ և լուսաաղմկային նռնակներ է կիրառել հարյուրավոր ֆերմերների դեմ, որոնք հինգշաբթի երեկոյան Սալոնիկում Agrotica միջազգային ցուցահանդեսի տարածքի մուտքի մոտ փորձել են ճեղքել անվտանգության ուժերի շղթան: Այս մասին հայտնում է Skai հեռուստաալիքի կայքը:
Նշվում է, որ ֆերմերներին հաջողվել է խափանել Agrotica ցուցահանդեսի բացումը:
Սալոնիկում հինգշաբթի տեղի է ունեցել գյուղատնտեսների զանգվածային ցույց, որին մասնակցել է մոտ 15 հազար մարդ՝ ֆերմերներ, անասնաբույծներ, ձկնորսներ:
Ֆերմերները, որոնք բողոքում են կենսաթոշակային բարեփոխման և հարկերի բարձրացման դեմ, հայտարարել են, որ ծրագրված Agrotica ցուցահանդեսը կբացեն անձամբ իրենք, ոչ թե գյուղատնտեսության նախարարը, դրա հետ կապված՝ ցուցահանդեսի տարածքի մոտ ուժեղացվել են դիրքային ուժերը: 1.500-2 000 ֆերմերներ փորձել են ճեղքել շղթան, ոստիկանությունն արցունքաբեր գազ և լուսաաղմկային նռնակներ է կիրառել նրանց զսպելու համար:
Սալոնիկում Միջազգային ցուցահանդեսի ղեկավարությունը հայտնել է, որ ցուցահանդեսի բացման արարողությունը չեղարկվում է: Հայտարարության մեջ նաև ասվում է, որ գյուղատնտեսական ցուցահանդեսը տոն է ֆերմերների համար, և բոլոր արտադրողներին հրավիրել է «մասնակցել Agrotica-ում առաջնային ոլորտի մեծ տոնին»:
Հունաստանի գյուղատնտեսության նախարար Վանգելիս Ապոստոլուն բախումների պատասխանատու է համարել «աջերի սադրիչ ուժերին և ուլտրաաջ ուժերին» և հույս է հայտնել, որ այդպիսի գործողություններին չի աջակցի ֆերմերների մեծ մասը: Նախարարի հայտարարության մեջ նշված է, որ վարչապետի հետ հանդիպելու և կառավարության հետ երկխոսելու ֆերմերների հրաժարումից հետո լարվածությունն աճում է:
Ֆերմերները վերջին օրերին ամեն օր մի քանի ժամով ճանապարհներ են արգելափակում, փետրվարի 4-ին Հունաստանում համընդհանուր գործադուլ կանցկացվի կենսաթոշակային բարեփոխման դեմ:
