Freedom House իրավապաշտպան կազմակերպությունը հրապարակել է իր «Ազատությունն աշխարհում 2016 թվականին» զեկույցը, համաձայն որի Հայաստանը ճանաչվել է մասնակի ազատ երկիր՝ ստանալով 46 միավոր։ Նշենք, որ Հայաստանը նույն ցուցանիշը գրանցել էր նաև անցած տարի։ Իրավապաշտպան Արթուր Սաքունցի խոսքերով՝ Հայաստանը դասվել է մասամբ ազատ երկրների շարքում, քանի որ անցած տարի մի շարք վճռորոշ իրադարձություններ եղան, որի ժամանակ ՀՀ իշխանությունները, այսպես ասած չհանձնեցին քննությունը։
Իրավապաշտպանի խոսքերով՝ Հայաստանը նման իրադարձություններից հետո հանգիստ կարող էր զբաղեցնել նաև ոչ ազատ երկրների շարքը։
Խոսքի ազատության պաշտպանության կոմիտեի նախագահ Աշոտ Մելիքյանի խոսքերով էլ, չնայած, Freedom House-ի գնահատականը վերաբերում է ընդհանուր ազատություններին, սակայն այն ներառում է նաև խոսքի ազատությունը, որի վիճակը նույնպես բարվող չէ Հայաստանում։
Աշոտ Մելիքյանը ևս հակված է կարծելու, որ ազատությունների մասով Հայաստանում դեռ մի բան էլ վատթարացել է վիճակը։
Մելիքյանը նկատում է, որքան էլ հայաստանյան իշխանությունները լուրջ չընկալեն միջազգային հեղինակավոր կառույցների արձագանքները, վերջիններիս հորդորեն չխառնվել Հայաստանի ներքին կյանքին, դրանից Հայաստանում վիճակն ավելի լավը չի դառնա։
