Թուրքական Hurriyet թերթի փոխանցմամբ՝ Թուրքիայի արդարադատության նախարարությունը մերժել է լրագրողների միջազգային մի շարք կազմակերպությունների ներկայացուցիչներին՝ հանդիպելու համար իերնց թուրք գործընկերների հետ։
Խոսքը թուրքական ընդդիմադիր Cumhuriyet թերթի գլխավոր խմբագիր Ջան Դյունդարի ու Անկարայում թերթի բյուրոյի ղեկավար Էրդեմ Գյուլի հետ հանդիպման մասին է, որոնք մեղադրվում են լրտեսության մեջ։
Մասնավորապես նրանց հետ հանդիպելու նպատակով Թուրքիայի արդարադատությանը դիմել են Մամուլի միջազգային ինստիտուտը, Լրագրողների պաշտպանության կոմիտեն, «Լրագրողներ առանց սահմանների» միջազգային կազմակերպությունը, Լրագրողների եվրոպական ու միջազգային ֆեդերացիան և այլն։
Հաղորդվում է, որ վերջին տարիներին թուրքական բանտերում ազատազրկում է կրել և կրում գրեթե 100 լրագրող և նրանց գործընկերներին հաճախ չեն թույլատրում հանդիպել նրանց հետ։ Սրանից առաջ հաղորդվել էր, որ Ստամբուլի դատախազությունը պահանջել է ցմահ ազատազրկման դատապարտել Ջան Դյունդարին ու Էրդեմ Գյուլին։
