Նախօրեի երեկոյան Երևան-Էջմիածին ավտոճանապարհի Փարաքար գյուղի հատվածում միմյանց են բախվել «Գազել» և «BMW» մակնիշի ավտոմեքենաներ:
«Գազելի» ուղևորների վկայությամբ` BMW-ի վարորդը դուրս է եկել մեքենայից, հայհոյանքներով ու սպառնալիքներ տեղալով` նախ բռունցքների, ապա քացիների տակ առել «Գազելի» տարիքավոր վարորդին: Րոպեներ անց ծեծող կողմը շատացավ` «Հրապարակ»-ին պատմել է ուղևորներից մեկը, ով դժվարությամբ է համաձայնել պատմել տեսածը: Ըստ նրա, դրանք դուրս թափվեցին BMW-ի միջից ու անխղճորեն հարվածների տակ առան խեղճ մարդուն:
«Գազելի» վարորդին` 65-ամյա Սուրեն Գևորգյանին, անգիտակից վիճակում տեղափոխել են «Արմենիա» բժշկական կենտրոն (Հանրապետական հիվանդանոց): Նրա վիճակն այնքան ծանր է, որ բացատրություն տալ չի կարողանում:
Սուրեն Գևորգյանն Արմավիրի մարզի Հայթաղ գյուղից է: Իրենց համագյուղացու հետ կատարվածը ցնցել է տեղի բնակիչներին: Վերջիններս զայրացած ու վիրավորված են: «Ցավալին այն է, որ սովորական պատահարը դարձել է լուրջ միջադեպ: Ինչ-որ ջահելներ, որ, ըստ խոսակցությունների, խմած են եղել, հարձակվել են մարդու վրա ու դաժանաբար ծեծել: Գյուղացիների վրդովմունքին չափ չկա»,- ասել է Հայթաղ համայնքի ղեկավար Սամվել Վարդանյանը:
Պարզվել է նաև Սուրեն Գևորգյանին ծեծող BMW-ի վարորդի ինքնությունը. 31-ամյա Գարրի Առաքելյանն է: Վերջինս ցինիկաբար հայտարարել է, թե իր դեմ խաղ չկա, որովհետև թիկունքին Սերժն է կանգնած:
«Հրապարակի» տեղեկություններով, Գարրի Առաքելյանը, թեև Աշտարակ քաղաքի գրանցում ունի, իրականում Վրաստանի Մառնեուլի շրջանից է և այն «հողատերերից», որոնք արդեն երրորդ տարին է` Արմավիրի մարզի մի շարք գյուղերում սոխի բիզնես են իրականացնում: Ըստ թերթի աղբյուրի` այդ հողերը պատկանում են որոշ պաշտոնյաների ու բարձրաստիճան զինվորականների, որոնց «դաբրոյով» էլ վրացահայերն իրենց այստեղ այդքան ազատ են զգում. այնքան ազատ, որ հայհոյում են, սպառնում, դաժանաբար մարդ ծեծում:
Հիվանդանոցում գտնվող Սուրեն Գևորգյանի առողջական վիճակն այս պահի դրությամբ ծանր է: Բժիշկները լրացուցիչ հետազոտություն են իրականացնում: Չի բացառվում վիրահատական միջամտությունը:
