ԱՄՆ մայրաքաղաքում մահացել է կինը, որն ավելի քան 30 տարի Սպիտակ տան մոտ պիկետ է կազմակերպել՝ հանուն խաղաղության և միջուկային զինաթափման: Այս մասին հայտնում է Washington Post-ը:
Հաղորդվում է, որ նա մահացել է երկուշաբթի՝ Վաշինգտոնի կացարաններից մեկում: Մահվան պատճառը և նրա ստույգ տարիքը հայտնի չեն, ենթադրում են, որ նա եղել է մոտ 80 տարեկան:
Կնոջ կյանքի մասին քիչ բան է հայտնի: Նա Իսպանիայից ԱՄՆ է գաղթել 1960թ.: Սկզբում աշխատել է Իսպանիայի դեսպանատանը, ամուսնացել է իտալացու հետ, որի հետ նրանք դուստր են որդեգրել: Սակայն հետո, ինչպես ավելի ուշ պատմել է Պիչոտոն, ինքը եզրակացրել է, որ իր ամուսինը զբաղվում է անօրինական որդեգրություններով: Նրանք ամուսնալուծվել են, իսկ երեխային տղամարդը վերցրել է, Պիչոտոն այլևս երբեք նրան չի տեսել:
1981թ. կինը միացել է հանուն խաղաղության ակտիվիստների շարժմանը և 2 համախոհների հետ դրել է իր հենակետը ԱՄՆ նախագահի նստավայրի հյուսիսային մուտքի դիմաց:
Ոստիկանությունը և Սպիտակ տան անվտանգությունը նրան չեն խանգարել խաղաղ բողոքել, վերջերս նրան օգնության են գնացել երիտասարդներ:
Այս տարիներին Պիչոտոն (Կոննի կամ Կոնչիտա՝ ինչպես նրան անվանել են ծանոթները) դարձել է Վաշինգտոնի խորհրդանիշներից մեկը: Ձեռագիր պաստառներով պիկետը լավ ծանոթ է քաղաքի բնակիչներին ու զբոսաշրջիկներին, որոնք հաճախ նրան լուսանկարել են: Պաստառը ձեռքին ծեր կնոջ կորացած, գլխարկով ու եղանակին ոչ համապատասխան տաք հագուստով կերպարը անցորդների շրջանում առաջացրել է կարեկցանք, հետաքրքրություն, երբեմն էլ՝ շփոթություն: Կոնչիտան իր առաքելության մասին ասել է. «Ես պետք է այստեղ լինեմ: Սա է իմ կյանքը»:
