Հայ Յեղափոխական Դաշնակցությունն ընդունել է կոալիցիայի մաս կազմելու Հանրապետական կուսակցության առաջարկը: Ինչպես օրերս հայտարարել է ՀՅԴ Բյուրոյի ներկայացուցիչ Հրանտ Մարգարյանը, իրենք այդ հարցի շուրջ բանակցություններ են ունեցել Սերժ Սարգսյանի հետ և «սկզբունքորեն» տվել իրենց համաձայնությունը:
Երեկ էլ Հանրապետական կուսակցության Գործադիր մարմնի նիստից հետո Գագիկ Մինասյանն իր խոսքում նշեց, որ հանրապետականները համագործակցության համար բաց են յուրաքանչյուր քաղաքական ուժի առաջ և շարունակում են բանակցություններն իրենց գործընկերների հետ: Թե ովքեր են այդ քաղաքական գործընկերները ՀՅԴ-ից բացի՝ Մինասյանը, սակայն, չմանրամասնեց:
Հանրապետական կուսակցության մի մեծ թև չի ցանկանում, որ Դաշնակցությունը կազմի կոալիցիայի մաս՝ կարծում է քաղաքական վերլուծաբան Արմեն Բաղդասարյանը:
Բաղդասարյանն ավելի հավանական ու արդյունավետ է համարում ՀՀԿ-ԲՀԿ կոալիցիան. եթե իրադարձությունները նման սցենարով չզարգանան մինչև ընտրությունները, ապա դա կլինի խորհրդարան մտնելուց հետո:
Խոսելով ՀՅԴ-ՀՀԿ կոալիցիայում հանրապետականների շահերի մասին՝ քաղաքական վերլուծաբան Հակոբ Բադալյանը կուսակցության ներսում առանձնացրեց մի քանի խումբ, որոնցից յուրաքանչյուրն ունի իր շահերը:
Ըստ վերլուծաբանի՝ Դաշնակցությունը ևս տարանջատված է մի քանի խմբերի, և այստեղ ևս մեկ ընդհանուր շահի մասին խոսելը սխալ կլինի:
